Namanganda viloyatning turizm salohiyatini oshirishga qaratilgan biznes-forum bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Mazkur anjumanda Malayziyaning Sabah shtatidagi 10 ga yaqin sayyohlik kompaniyasi hamda Namanganda turizm sohasida faoliyat yuritayotgan biznes vakillari ishtirok etdi.
Malayziyalik mehmonlar Namangan viloyatining turizm salohiyati bilan tanishtirildi. O‘z navbatida, Malayziya kompaniyalari ham mamlakatning turizm sohasidagi imkoniyatlarini taqdim etdi.
Biznes-forum doirasida Namangan viloyati Turizm va madaniy meros boshqarmasi hamda Malayziyaning Funholiday Tours & Travel kompaniyasi o‘rtasida hamkorlik memorandumi imzolandi.
B2B formatda bo‘lib o‘tgan uchrashuvlarda esa Namangan viloyati turizm biznesi vakillari malayziyalik hamkasblari bilan muloqotda bo‘lib, hamkorlik o‘rnatish bo‘yicha bir qator kelishuvlarga erishdi.
“Anjumanda Namangan viloyati va Sabah shtati o‘rtasida do‘stlik aloqalari o‘rnatish masalalari ham ko‘rib chiqildi. Qolaversa, Namangandan Malayziyaga charter reyslarni yo‘lga qo‘yish bo‘yicha amaliy takliflar bildirildi”, — deydi viloyat hokimining turizm va madaniy meros masalalari bo‘yicha o‘rinbosari Botir Nuriddinov.
Tadbirdan so‘ng malayziyalik mehmonlar uchun “Sulton Uvays Qaroniy” ziyoratgohi va “Axsikent” ochiq osmon ostidagi muzeyiga sayohat tashkil etildi.
