Avval xabar berilganidek, 25-iyun kuni O‘zbekiston Konstitutsiyasiga o‘zgartishlar kiritish to‘g‘risidagi qonun loyihasi jamoatchilik muhokamasiga qo‘yildi.
Unga ko‘ra, pedagog xodimlarning huquqlari, sha’ni va obro‘-e’tibori davlat himoyasida ekani kafolatlanmoqda.
“Pedagog xodimlarning kasbiy faoliyatiga aralashishga, shuningdek, ularning xizmat majburiyatlarini bajarishiga monelik qilishga yo‘l qo‘yilmaydi”, — deyiladi 41-moddaga kiritilayotgan o‘zgarishda.
Shavkat Mirziyoyev 2022-yil 20-iyunda Konstitutsiyaviy komissiya a’zolari bilan o‘tkazilgan uchrashuvda “Ustoz va murabbiylar – bilimlarni, urf-odat va an’analar, madaniyatimizni avloddan-avlodga yetkazadigan buyuk kuchdir. Shunday ekan, ustozga bo‘lgan yuksak ehtirom Konstitutsiyamizda o‘z ifodasini topishi zarur.
Shuningdek, pedagog xodimlarning kasbiy faoliyatiga aralashish, ularning xizmat majburiyatlarini bajarishiga to‘sqinlik qilishga yo‘l qo‘yilmasligini Konstitutsiya darajasida belgilab qo‘yish lozim” deb ta’kidlab, mazkur yo‘nalishdagi ustuvor vazifalarni belgilab bergandi.
Taraqqiyot strategiyasining 4-yo‘nalishida belgilangan maqsadlarga ko‘ra, o‘quv o‘rinlari sonini 2026-yil yakuniga qadar 6,4 milliongacha yetkazish, Oliy ta’lim bilan qamrov darajasini 50 foizga yetkazish va ta’lim sifatini oshirish aosiy vazifa sifatida qo‘yilgan. Ushbu maqsadlarga erishish birinchi navbatda pedagog xodimlarning huquqlarini, ayniqsa ularning davlat himoyasida ekanini, faoliyatiga aralashishga yo‘l qo‘yilmasligini Konstitutsiya bilan kafolatlashni talab qiladi.
Mazkur qo‘shimchalar, pedagog xodimlarning ijtimoiy qo‘llab-quvvatlanishi, o‘z kasbiy faoliyatini amalga oshirishi, ularning ijtimoiy maqomi va obro‘sini oshirish uchun tashkiliy-huquqiy shart-sharoitlar yaratishi, shuningdek, o‘z huquq va qonuniy manfaatlarini amalga oshirish uchun kafolatlar berishga xizmat qiladi.
Izoh (0)