PFL Superliganing iyun oyidagi eng yaxshilari nomini ma’lum qildi.
“Navbahor” futbolchisi Jamshid Iskandarov iyun oyining eng yaxshi o‘yinchisi deb topildi. Iskandarov iyun oyidagi uchta o‘yinda ikkita gol urishga erishdi.
Ushbu sovrin uchun, shuningdek, quyidagi futbolchilar kurash olib borgandi: Aleksandr Stanisavlevich (“Qizilqum”), Akmal Mozgovoy (“Nasaf”), Farrux Sayfiyev (“Paxtakor”), Po‘latxo‘ja Xoldorxonov (“Olimpik”), Husayn Norchayev (“Nasaf”), Temurxo‘ja Abduxoliqov (“Qizilqum”), Behzod Shamsiyev (“Olimpik”), Shukron Yo‘ldoshev (“Olimpik”).
“Olimpik” ustozi Timur Kapadze oy yakunlari bo‘yicha eng yaxshi murabbiy nomiga loyiq ko‘rildi. Kapadze jamoasi o‘tgan oyda 4 ta o‘yin o‘tkazib, bitta g‘alaba va 3 ta durang qayd etdi, to‘plar nisbati — 4:3.
Iyun oyining eng yaxshi murabbiyi nomiga quyidagilar ham da’vogar bo‘lgandi: Viktor Karpenko (“Bunyodkor”), Samvel Babayan (“Navbahor”), Slavche Voyneski (“Paxtakor”), Ro‘ziqul Berdiyev (“Nasaf”).
Aprel oyida eng yaxshi murabbiy Mirjalol Qosimov (“OKMK”), eng yaxshi o‘yinchi Ignatiy Nesterov (“Qizilqum”) bo‘lgandi. May oyida esa “Nasaf” yarim himoyachisi Oybek Bozorov eng yaxshi futbolchi, “Nasaf” ustozi Ro‘ziqul Berdiyev esa eng yaxshi murabbiy deb topilgandi.
Izoh (0)