Raul Gonsales Kataloniya klubi taklifni rad etdi. U “Real”ning ikkinchi jamoasida ishini davom ettiradi

“Real” sobiq futbolchisi, hozirda “Kastilya” bosh murabbiyi vazifasini bajarayotgan Raul Gonsalesga “Espanyol” jamoasi taklif bilan chiqdi.

Raul Kataloniya klubi taklifini rad etgan. Mutaxassisning “qaymoqranglilar” klubi bilan munosabatlari juda yaxshi, shuning uchun Madrid afsonasi “Real”ning ikkinchi jamoasida to‘rtinchi mavsumda ham qolishni xohlamoqda.

“Real” rahbariyati Raulda kelajakda asosiy jamoani boshqarish uchun kerak bo‘ladigan barcha jihatlar bor deb hisoblaydi. Klub unga Segundada munosib ishtirok etish uchun kurasha oladigan sifatli futbolchilarni yetkazib berishga harakat qilmoqda.

Raul yoshlar murabbiyi sifatida yaxshi natijalar qayd etgan va hozirda “Kastilya”da munosib ish olib bormoqda. Gonsales Karlo Anchelottidan so‘ng “Real” bosh murabbiyi bo‘lish uchun asosiy nomzodlardan biri bo‘lib turibdi.

Raul 1994-yildan 2010-yilga qadar “Real” sharafini himoya qilgan.