O‘zbekistonda aholi daromadining kreditga yo‘naltiradigan qismini soliqdan ozod qilish chegarasi oshiriladi
Shavkat Mirziyoyev 18-iyul kuni o‘tkazilgan videoselektor yig‘ilishida aholini qiynayotgan uy-joy bilan bog‘liq masalalarga to‘xtalib o‘tdi. Bu haqda prezident matbuot kotibi xabar qildi.
Qayd etilishicha, uch yil avval aholini uy-joy bilan ta’minlash bo‘yicha bozor tamoyillariga asoslangan yangi ipoteka tizimi joriy etilgan. Natijada o‘tgan besh oyda ipoteka kreditlari hajmi 2,5 baravarga oshib, 310 mingdan ziyod oila shaxsiy uy-joyga ega bo‘lgan. Uy-joy qurilish hajmi ham 3 baravar oshgan.
Shu o‘rinda, joriy yilda asosiy stavka oshganiga qaramay, ipoteka kreditlari bo‘yicha banklarga ajratiladigan resurs stavkalari o‘zgarishsiz qoldirilgan. Natijada shu yilning besh oyida 30 ming nafar yoki o‘tgan yilning mos davriga nisbatan 1,5 baravarga ko‘p fuqarolarga imtiyozli ipoteka krediti ajratilgan.
“Lekin ipoteka kreditlarining cheklangan hajmi va subsidiya ajratishda byurokratiya bo‘yicha aholi tomonidan ko‘plab e’tirozlar bildirilmoqda”, — deyiladi xabarda.
Shuning uchun mutasaddilarga 1-sentabrdan boshlab:
- aholi daromadining kreditga yo‘naltiradigan qismini soliqdan ozod qilish chegarasini oshirish;
- ipoteka kreditini ajratishda aholi daromadlari bo‘yicha tijorat banklariga qo‘yiladigan talablarni yengillashtirish bo‘yicha qaror loyihasini kiritish topshirilgan.
