Agar Britaniya tashqi ishlar rahbari Liz Trass bosh vazir etib saylansa, Indoneziyadagi G20 sammitida Rossiya prezidenti Vladimir Putin bilan uchrashishga tayyor. Bu haqda u ITV telekanalidagi debatda ma’lum qildi.
“Bizda Vladimir Putinga tanbeh berayotgan erkin dunyo ovozlari borligi juda muhim, deb o‘ylayman. Men Rossiya tashqi ishlar vaziri Sergey Lavrovni tartibga chaqirishga tayyor edim. Putin bilan bevosita suhbatga hamda uni Hindiston va Indoneziya kabi yirik davlatlar ishtirokidagi uchrashuvga taklif qilishga tayyorman. Men u yerga boraman va u (Putin) bilan gaplashaman”, — dedi Trass.
Buyuk Britaniyaning Xalqaro savdo bo‘yicha vazir o‘rinbosari Penni Mordont va Jamoatlar palatasi qo‘mita raisi Tom Tugendxat, Rossiya Ukrainada jang qilayotgan bir paytda Putin bilan muzokara stoliga o‘tirishdan bosh tortgan edi. Xotin-qizlar va tenglik bo‘yicha sobiq vazir o‘rinbosari Kemi Badenok vaqtini behuda sarf qilmasligini aytgan. Sobiq moliya vaziri Rishi Sunak esa Rossiya moliya vazirining ishtiroki tufayli G20 da qatnashishdan butunlay bosh tortgan edi.
Buyuk Britaniya bosh vaziri Boris Jonson 7-iyul kuni iste’foga chiqishini e’lon qildi. U bu qarorni o‘zi rahbarlik qiladigan Konservativ partiyaning istagi bilan izohladi. Jonson Britaniya rasmiylari Ukrainaning ozodlik uchun kurashini qo‘llab-quvvatlashda davom etishiga va’da berdi. Siyosatchi yangi bosh vazir saylanmaguncha o‘z lavozimida qoladi.
Ayni paytda Indoneziyada G20 davlatlari tashqi ishlar vazirlarining yig‘ilishi bo‘lib o‘tdi. Mezbon davlat vaziri Retno Marsudining aytishicha, G7 davlatlari Rossiya tashqi ishlar vaziri Sergey Lavrovning ishtiroki tufayli o‘z vakillarini salomlashuv ziyofatiga yuborishdan bosh tortgan, deb xabar bermoqda Reuters.
Shu bilan birga, G‘arb davlatlari delegatlari rossiyalik vazir bilan birgalikda suratga tushishdan qochgan. Tashkilotchilar esa an’anaviy guruh bo‘lib suratga tushishni bekor qilgan, Larov hech kim uni suratga tushishga taklif qilmaganini aytgan.
Izoh (0)