“Bir oydan keyin har bir viloyat hokimi qilgan ishlari haqida alohida hisobot beradi” — Shavkat Mirziyoyev

Shavkat Mirziyoyev 18-iyul kungi videoselektor yig‘ilishida bundan buyon yig‘ilish va qarorlar kamaytirilib, ijro va aholi muammolari bo‘yicha ishlanadigan tizim bo‘lishi haqida gapirdi. Bu haqda prezident matbuot kotibi xabar qildi.

“Samarqand viloyatidagi o‘rganishlar ko‘p kamchiliklarimizni ko‘rsatdi. Bir oydan keyin har bir viloyat hokimi qilgan ishlari haqida alohida hisobot beradi.

Oldimizda hali eng qiyin va og‘ir islohotlar turibdi. Hamma o‘zgarishi kerak, ish uslublarini ham o‘zgartirishi kerak”, — deydi prezident.

Vazirlar Mahkamasida, vazirlar va hokimlar ham o‘z tizimida o‘n kun muddatda strukturasi va ish uslublarini o‘zgartirishi shartligi ko‘rsatib o‘tilgan. Adliya vazirligiga muddatda aholi va tadbirkorlarni yangiliklardan xabardor qilish va ularga qulayliklar yaratish hamda qonunchilikni ixchamlashtirish bo‘yicha yangi tizimni ishlab chiqish topshirilgan.

Hisob palatasi, Moliya vazirligiga berilayotgan mablag‘lar maqsadli ishlatilishi, qurilishni moliyalashtirish, subsidiya va kompensatsiya ajratish jarayonlarini raqamlashtirish bo‘yicha yangi tizimni ishlab chiqish topshirilgan.

“Umuman, hamma mahalla, tumanga tushib, muammolarni ichiga kirib, aniq natijaga ishlashi shart”, — degan davlat rahbari.