“Bavariya” Matteys de Ligt transferi bo‘yicha “Yuventus” bilan og‘zaki kelishuvga erishdi

Himoyachi Matteys de Ligt “Yuventus”dan “Bavariya”ga o‘tadi.

Jurnalist Janluka di Marsioning xabar berishicha, transfer borasida og‘zaki kelishuvga erishilgan: myunxenliklar 70 million yevro to‘lash kafolatini olgan va yana qo‘shimcha 10 million yevro bonus sifatida to‘lab beradi.

Bild jurnalisti Kristian Falk “Yuventus” “Bavariya”ning taklifini qabul qilganini tasdiqladi.

De Ligtning o‘zi turinliklar safini tark etishni va nemis klubiga o‘tishni xohlamoqda. Futbolchi “Bavariya” bilan 2027-yil yozigacha mo‘ljallangan shartnoma va yiliga 12 million yevro maosh borasida kelishuvga erishgan.

Avvalroq “Bavariya” himoyachi uchun 60+10 million yevro taklif qilgani, “Yuventus” esa uni rad etgani xabar qilingandi. Shuningdek, Matteysga “Chelsi” va “Manchester Yunayted” Matteys de Ligtga qiziqish bildirayotgani ma’lum bo‘lgandi.

Niderlandiyalik himoyachi “Yuventus”dagi 3 mavsumi davomida 117 ta o‘yinda ishtirok etib, 8 ta gol va 3 ta golli uzatmaga mualliflik qilgan.