“Bavariya” hujumchisi Robert Levandovski “Barselona”ga o‘tdi.
Nemis jamoasi polshalik hujumchi transferi borasida kelishuvga erishganini ma’lum qildi.
Kataloniya klubi Levandovski uchun 45 million yevro va qo‘shimcha 5 million bonus sifatida to‘lab berishi kutilmoqda.
Robert 8 yil davomida “Bavariya” sharafini himoya qilib keldi. Hujumchi 2014-yilda “Borussiya D” safidan Myunxen jamoasiga kelib qo‘shilgan edi.
Levandovski “Bavariya” bilan birga 8 marta Bundesliga chempionligi, 3 marta Germaniya Kubogi, 5 marta Germaniya Superkubogini qo‘lga kiritgan. 2019/20-yilgi mavsumda esa Chempionlar Ligasida zafar quchgan.
Shuningdek, ketma-ket 5 mavsumdan buyon Germaniya chempionati to‘purari maqomini hech kimga bermay kelayotgan edi.
Robert Levandovski 8 mavsum davomida “Bavariya” safida 375 o‘yinda 344 ta gol va 72 ta golli uzatmaga mualliflik qilgan.
Izoh (0)