O‘zbekistonliklar yil boshidan beri qancha valyuta sotib olgani va sotgani ma’lum bo‘ldi
2022-yil boshidan o‘zbekistonliklar banklardan 3,7 mlrd dollar miqdorida valyuta sotib olgan. Bu haqida Markaziy bank xabar berdi.
Bu 2021-yilning mos davriga nisbatan 85 foizga ko‘proqdir
Shuningdek, yil boshidan o‘zbekistonliklar banklarga 5,6 mlrd dollar miqdorida xorijiy valyuta sotgan. Bu o‘tgan yilning mos davriga nisbatan 70 foizga ko‘proqdir.
Avvalroq Rossiya rublining o‘zbek so‘miga nisbatan sotish va sotib olish kursi banklar tomonidan mustaqil ravishda joriy xalqaro kotirovkalarga asosan belgilanib, kun davomida zaruriyatga ko‘ra o‘zgartirib borilishi mumkinligi to‘g‘risida xabar berilgandi.
Markaziy bank ta’kidlashicha, O‘zbekistonda jismoniy shaxslar tomonidan xorijiy valyutani (naqd va naqdsiz shaklda) olib kirish va olib chiqish bo‘yicha maxsus tartib o‘rnatilgan bo‘lib, ushbu tartib ichki valyuta bozoriga keskin ta’sir ko‘rsatishi mumkin bo‘lgan miqdorlarda pul oqimlarining vujudga kelishiga yo‘l qo‘ymaydi.
Markaziy bank mavjud vaziyatni doimiy onlayn ravishda kuzatib borayotgani va zarur hollarda aholi manfaatlarini hamda milliy valyuta va bank tizimi barqarorligini ta’minlash bo‘yicha qo‘shimcha choralar ko‘rilishini ma’lum qilgan edi.
