O‘zbekistonda 6,6 million o‘quvchi yangi o‘quv yilidan boshlab yagona maktab formasiga o‘tishi kutilmoqda. Bu haqda Xalq ta’limi vazirligi tomonidan “O‘zto‘qimachiliksanoat” uyushmasi bilan hamkorlikda Namanganda tashkil etilgan press-tur davomida ma’lum qilindi, deya xabar beradi “Daryo” muxbiri Azizbek Abduvaliyev.
OAV vakillari va blogerlar Namangan shahridagi “Dashtbog‘” kichik sanoat zonasida joylashgan to‘qimachilik korxonalari faoliyati bilan yaqindan tanishdi.
Tanishuv davomida maktab formalarining belgilangan standartlar asosida tayyorlanishi, matolar sifati, bichimi, rangi, tikilish uslublari, turli yosh, bo‘y va vaznga ega o‘quvchilarga mos kelishi haqidagi misol va ma’lumotlar taqdim etildi.
Xalq ta’limi vazirligi boshqarma boshlig‘i Jamoliddin Fozilovning bildirishicha, “O‘zto‘qimachiliksanoat” uyushmasi tomonidan vazirlikka maktab formalarini tayyorlash imkoniyati va tajribasiga ega 560 dan ortiq to‘qimachilik korxonasi ro‘yxati taqdim etilgan. Vazirlik ishlab chiqaruvchilarning narx siyosatiga aralashmaydi, ular o‘zlarining xarajatlari va mavjud talabdan kelib chiqib, maktab formalari uchun narx belgilaydi. Shu bilan birga, o‘quvchilar orasida kamxarj oilalar farzandlari ham borligi inobatga olingan.
“Hisob-kitoblarimizga ko‘ra, mamlakatda 414 mingdan ortiq o‘quvchining oilasi maktab formalarini xarid qilishda moliyaviy muammolarga duch kelishi mumkin. Ularga mahalliy byudjetning qo‘shimcha manbalari hamda ‘temir daftar’, ‘ayollar daftari’ va ‘yoshlar daftari’ jamg‘armalari mablag‘lari hisobidan maktab formalarini bepul olib berish ko‘zda tutilgan”, — deydi Jamoliddin Fozilov.
“O‘zto‘qimachiliksanoat” uyushmasi dizaynerlik ishlanmalarini joriy etish bo‘limi boshlig‘i Kamola G‘ulomovaning aytishicha, maktab formalarining shakl-shamoyili borasidagi izlanishlar 2017-yildayoq boshlangan va qisqa vaqt davomida ularning yuzdan ortiq ko‘rinishi yaratilgan. Ushbu dizaynerlik ishlanmalaridan 10 tasi tanlab olingan va qishloq sharoitida Sirdaryoda, shahar sharoitida esa Toshkentda sinab ko‘rilgan. O‘quvchilar va ularning ota-onalari o‘rtasida ularning qulayligi, sifati, yuvilish xususiyatlari bo‘yicha so‘rovnomalar o‘tkazilgan.
“Biz birinchi galda maktab formalarining bolalar uchun bezarar bo‘lishiga e’tibor qaratdik. Tasdiqlangan talablarga ko‘ra, quyi sinf o‘quvchilarining kiyimida 35, yuqori sinf o‘quvchilari kiyimida esa 50 foizgacha sun’iy mato va tolalar qo‘llanishi mumkin. O‘tgan yillar mobaynida O‘zbekistonda ishlab chiqarilgan matolarning sifati ham ancha o‘zgardi. Shu sababli mahalliy matolar asosida maktab formalari tikayotgan korxonalarimiz safi kengaydi”, — deydi Kamola G‘ulomova.
Tadbirda ta’kidlanishicha, 2022-yil 10-avgustdan boshlab shahar-tuman markazlari va bevosita ta’lim muassasalarining o‘zida maktab yarmarkalari o‘tkazilib, maktab formalari savdosi tashkil etiladi.
Mavzuga doir:
Izoh (0)