Andijonda tanishining Cobalt’ini olib qochgan ayol YTHga uchradi

Andijon viloyati Asaka tumanida 19 yoshli ayol tanishini avtomobilini olib qochdi.

2022-yil 11-iyul kuni soat 00:30 larda, Asaka tumanida yashovchi 19 yoshli N.D. (ayol), o‘ziga oldindan tanish bo‘lgan 22 yoshli A.I.ni (erkak) boshqaruvidagi Cobalt rusumli avtomashinasida Asaka tumani Arg‘in MFY Janon-2 ko‘chasiga birga kelib, haydovchi A.I. avtomashinadan tanishlari bilan gaplashish maqsadida tushib ketganidan va avtomashinani dvigatelini o‘chirmay kalitini o‘zida qoldirib ketganligidan foydalanib, avtomashinani rul boshqaruviga o‘tirib, A.I.ning ruxsatisiz avtomashinasini olib qochgan.

So‘ngra Asaka—Shahrixon transport qatnov yo‘lining Shahrixon yo‘nalishi bo‘yicha boshqarib ketayotib, Shahrixon tumani hududiga yetganida boshqaruvni yo‘qotib, yo‘l-transport hodisasi sodir etgani aniqlangan.

Mazkur holat yuzasidan Asaka tumani IIB huzuridagi Tergov bo‘linmasi tomonidan N.D.ga nisbatan O‘zbekiston Respublikasi Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilgan.

Hozirda yuqoridagi shaxs nima sababdan ushbu jinoyatga qo‘l urganligi aniqlanmoqda. Tergov harakatlari olib borilmoqda.