O‘zbekistonda yil boshidan buyon eng ko‘p soliq to‘lagan korxonalar e’lon qilindi

Joriy yil boshidan beri O‘zbekistonda qaysi korxonalar eng ko‘p soliq to‘lagani ma’lum qilindi. Bu haqda Davlat soliq xizmati xabar berdi.

Yanvar oyidan buyon 10 ta eng yirik soliq to‘lovchi korxonalar to‘lagan mablag‘ mamlakat jami soliq tushumining 32,4 foizini tashkil etdi — 23 trln so‘m.

“Navoiy kon-metallurgiya kombinati” birinchi o‘rindagi eng yirik soliq to‘lovchi hisoblanadi. 6 oy davomida korxona 9,6 trln so‘m soliq to‘lagan.

Ikkinchi o‘rinda — “Olmaliq kon-metallurgiya kombinati”. Korxona yanvar oyidan beri 5,1 trln so‘m soliq to‘lagan.

Uchinchi o‘rinda — “O‘ztransgaz” bo‘lib, u yil boshidan buyon 1,9 trln so‘m soliq to‘lagan.

To‘rtinchi o‘rinda — “O‘zbekneftgaz”. Kompaniya to‘lagan soliq hajmi — 1,5 trln so‘m.

Beshinchi o‘rinda — “Hududgazta’minot”. 1-yarim yillikda korxona to‘lagan soliq — 1,4 trln so‘m.

Keyingi o‘rinlarda mos ravishda Uzbat A.O. (1 trln so‘m), “Lukoyl” (700 mlrd so‘m), UzAutoMotors (700 mlrd so‘m), Uz-Kor gas chemical (600 mlrd so‘m) va “Buxoro neftni qayta ishlash zavodi” (500 mlrd so‘m) joylashgan.

Avvalroq O‘zbekistonda eng ko‘p soliq olingan hududlar ma’lum bo‘lgan edi.