O‘zbekiston oliy ta’lim tizimida masofaviy ta’lim shakli joriy etiladi

AOKAda Oliy va o‘rta maxsus ta’lim vazirligi axborot xizmati rahbari Mo‘min Ibodov ishtirokida o‘tkazilgan brifingda 2022-yilda davlat dasturida belgilangan vazifalar ijrosi yuzasidan ma’lumot berildi.

Davlat dasturiga asosan, Namangan muhandislik-texnologiya instituti negizida Namangan to‘qimachilik sanoati institutini tashkil etish bo‘yicha prezident qarori loyihasi ishlab chiqilgan va Vazirlar Mahkamasiga kiritilgan.

Shuningdek, ishlab chiqarishdan ajralmagan holda oliy ma’lumot olish imkoniyatini yanada kengaytirish, bunda bosqichma-bosqich masofaviy ta’lim shaklida kadrlar tayyorlashni yo‘lga qo‘yish bo‘yicha Vazirlar Mahkamasi qarori loyihasi ishlab chiqilgan.

Prezidentning tegishli qarori bilan Is'hoqxon Ibrat nomidagi Namangan davlat chet tillar instituti faoliyati tashkil etilgan.

Shuningdek, davlat dasturining 213-bandida ishlab chiqarishdan ajralmagan holda oliy ma’lumot olish imkoniyatini kengaytirish, bunda bosqichma-bosqich masofaviy ta’lim shaklida kadrlar tayyorlashni yo‘lga qo‘yish bo‘yicha Vazirlar Mahkamasi qarori loyihasini ishlab chiqish belgilangan. Bu borada “Oliy ta’lim tizimida masofaviy ta’lim shaklini joriy etish chora-tadbirlari to‘g‘risida”gi qaror loyihasi tayyorlanib, Vazirlar Mahkamasiga kiritilgan.