MasterCard dunyodagi yirik to‘lov tizimlaridan biri hisoblanadi. Ushbu xalqaro karta deyarli barcha mamlakatlarda qabul qilinadi.
“Daryo” O‘zbekistonning barcha banklarida MasterCard karta ochish, xizmat ko‘rsatish tariflari, bank tanlashda nimalarga ahamiyat berish kerakligi va ularning narxi haqida so‘z yuritadi.
MasterCard kartalari — xalqaro to‘lov tizimlarida qo‘llaniladigan xalqaro karta hisoblanadi.
Masalan, UzCard va Humo kartalari orqali xalqaro internet-do‘konlarga to‘lov qilish imkoniyati deyarli yoq (kobeyjing kartalar bundan mustasno).
Xalqaro kartalar orqali esa App Store, Google Play va Amazon kabi do‘konlarga to‘lovlarni amalga oshirish mumkin.
Dunyoda yana bir keng foydalaniladigan kartalardan bir bu — Visa.
Visa va Mastercard o‘rtasidagi eng katta kartalar o‘z to‘lov tarmog‘ida ishlashidadir. Visa kartasi Mastercard tarmog‘ida ishlamaydi va aksincha.
MasterCard’ning qanday turlari bor?
O‘zbekistonda MasterCard kartalarining Virtual, Standard, Gold va Premium kabi turlari mavjud.
MasterCard Virtual elektron ravishda ochiladi, shu sababli uni terminallarda yoki bankomatlarda ishlatish mumkin emas. Asosiy afzallik — rasmiylashtirishning osonligi va past tariflardir.
Eng keng tarqalgan tur — MasterCard Standard. Unda xizmat ko‘rsatish past narxda va keng funksionallikda bo‘ladi.
Karta yordamida mehmonxona xonasini bron qilish, aviachiptalarni xarid qilish kabilarni amalga oshirish mumkin.
Bu dunyo bo‘ylab MasterCard 3 xil bo‘ladi:
- MasterCard Standard;
- MasterCard World;
- MasterCard World Elite.
O‘zbekistonda MasterCard World Elite faqat “Milliy bank”da mavjud bo‘lib, uning narxi 700 ming so‘m etib belgilangan.
Bunda mijoz ko‘plab qulayliklarga ega bo‘ladi. Misol uchun dunyo bo‘ylab aeroport, restoran, mehmonxona, do‘konlar tarmog‘i va boshqa xizmatlar uchun qulayliklar.
Karta qanday ochiladi?
Deyarli barcha banklarda kartani rasmiylashtirish uchun faqat pasport va pul talab qilinadi.
Aksariyat hollarda bank ofisiga ikki marta borish talab etiladi: birinchisida — ariza yozib, hujjatlar taqdim etiladi, ikkinchisi — tayyor kartani olish uchun.
Bundan tashqari, hozirda MasterCard kartalarga onlayn buyurtma berish imkoniyati ham mavjud. Bunda MasterCard ochish uchun tanlangan bankning rasmiy saytiga kirish kerak.
Banklarning tartib-qoidalaridan kelib chiqib, tayyor kartani bank ofisidan olib ketish yoki yetkazib berish xizmatidan foydalanish mumkin.
Karta 2−3 yilga amal qiladi. Ushbu davrdan so‘ng, bank kartani bepul qayta chiqaradi.
Shu bilan birga, xalqaro kartani ochish va undan foydalanish uchun bankka komissiya to‘lash kerak bo‘ladi :
- karta turiga qarab narxlar — 700 ming so‘mgacha;
- kartadan foydalangan holda to‘lovlarni amalga oshirishda komissiyalar har bir tranzaksiya summasining 1 foizigacha yechib olinadi.
O‘zbekiston bo‘ylab “Ravnaq bank”, “Milliy bank”, “Oriyent finans bank”, “Asakabank” va “Anor bank”da ayrim turdagi MasterCard kartalarini ochish bepul.
Karta ochish uchun bankni qanday tanlash kerak?
Avvalo tariflarga e’tibor berish kerak — narxi, naqd pul olish va tovarlar uchun komissiya, minimal qoldiq miqdori va boshqalar.
Banklarning saytlarida nafaqat bank filiallari, balki bankomatlar joylashgan manzillar ham ko‘rsatilgan. Ularga e’tibor berish kerak.
Bunga sabab — karta chiqarilgan bank bankomatlaridagina pulni bepul yechish mumkin. Agar boshqa bankda naqd pul olinsa, ikkala bank ham komissiya yechib oladi.
Shuningdek, hamma banklarda xalqaro kartalarga xizmat ko‘rsatish turlicha bo‘ladi.
“Bank xizmatlari” sayti orqali qulay bank va karta turini tanlash imkoniyati bor.
Keyingi maqolalarda UnionPay va kobeyjing kartalari haqida to‘liq ma’lumotlar beriladi.
Avvalroq O‘zbekistonda Visa karta ochish jarayoni haqida ma’lum qilingan edi.
