UNICEF bilan hamkorlikda Qoraqalpog‘iston, Qashqadaryo, Termiz va Toshkent shaharlarida qizlar uchun Skills4Girls bepul o‘quv dasturi ishga tushirildi. Bu haqda IT Park xabar berdi.
Dasturda 12-18 yosh oralig‘idagi barcha qizlar raqamli savodxonlik va grafik dizayn bo‘yicha ishtirok etishi mumkin.
Loyiha qizlarga IT sohasidagi asosiy ko‘nikmalarni berish uchun mo‘ljallangan. Unda qatnashish orqali qizlarda ishga joylashish yoki frilanser sifatida faoliyat boshlash imkoniyati paydo bo‘ladi.
Loyiha 6 oy davomida — iyundan noyabrgacha olib boriladi.
Raqamli savodxonlik kursi Microsoft Office, Web texnologiyalari (HTML va CSS) va Scratch asoslaridan tashkil topgan.
Grafik dizayn esa Photoshop va Corel Draw dasturlari bilan ishlashni o‘z ichiga oladi. Bundan tashqari, loyiha ishtirokchilariga mentorlik yordami beriladi.
Avvalroq IT Park Qoraqalpog‘iston ayollari uchun ta’lim loyihasini ishga tushirgani haqida xabar berilgandi.
Izoh (0)