Avvalroq ijtimoiy tarmoqlarda ayrim banklarda naqd pul yechish bo‘yicha komissiya to‘lovlari 3 foizgacha oshirilgani haqida xabarlar tarqalgan edi. Markaziy bank bunga munosabat bildirdi.
2022-yilning 11-iyul kuni tushlikdan keyin ijtimoiy tarmoqlarda ayrim bankomatlardan naqd pul yechishda yechilayotgan naqd pul miqdoridan kelib chiqib 3 foizgacha komissiya to‘lovlari olinayotganligi to‘g‘risida xabarlar tarqaldi.
Markaziy bank ushbu holat yuzasidan quyidagilarni ma’lum qiladi:
Bayram kunlari munosabati bilan O‘zbekiston hududidagi 9,5 mingdan ortiq bankomatlarning uzluksiz ishlashi va yetarli miqdorda naqd pullar bilan ta’minlash choralari ko‘rilgan.
Bankomatlardan naqd pul yechish uchun komissiya to‘lovlari banklar tomonidan bankomatga xizmat ko‘rsatish xarajatlaridan kelib chiqib mustaqil belgilanadi va bugungi kunda 1 foizdan oshmaydi.
Ayrim banklar tomonidan alohida bir bankomatda eksperiment tariqasida tabaqalashgan yuqori komissiya to‘lovi o‘rnatilgan bo‘lsa, erkin bozor sharoitida bu o‘zini oqlamaydi, — deydi Markaziy bank.
Chunki boshqa bankomatlarda komissiya to‘lovi 1 foiz yoki undan past qilib belgilanganligi sababli iste’molchilar arzonroq xizmatdan foydalanishni afzal ko‘radi.
Markaziy bank ijtimoiy tarmoq foydalanuvchilaridan ma’lumotlarni tarqatishda ularning haqiqiyligini va tizimdagi xizmatlar ko‘lamiga ta’sirini inobatga olishni so‘ragan.
Izoh (0)