Iste’foga chiqishini e’lon qilgan Britaniya bosh vaziri Boris Jonson keyingi saylovlarda siyosatni tark etish to‘g‘risida o‘ylamoqda. Bu haqda The Telegraph xabar berdi.
Nashr manbalariga ko‘ra, Jonson hozircha deputatlik mandatidan voz kechmoqchi emas, biroq ayni paytda o‘zidan oldingi bosh vazir Tereza Mey kabi jamoatlar palatasida qolish-qolmasligiga ishonchi komil emas.
Jonson uchun ehtimoliy variantlardan biri — publitsistik faoliyatga yoki ma’ruzalarga qaytish, deb yozadi gazeta. Hodder & Stoughton nashriyot uyi undan Uilyam Shekspirning tarjimayi holini kutmoqda, maqola 2016-yilda dramaturg vafotining 400 yilligi munosabati bilan chiqishi kerak edi. Jonson 88 000 funt sterling miqdorida avans olib qo‘ygan, biroq siyosatchi Buyuk Britaniya tashqi ishlar vaziri etib tayinlanganidan so‘ng nashriyot maqolani “vaqti kelguncha kechiktirishga rozi bo‘lgan”.
Aprel oyida Jonson koronavirus pandemiyasi davrida Dauning-stritdagi bazmlar bilan bog‘liq janjallarga qaramay, u bosh vazir kursisida qolishi va 2024-yilga belgilangan navbatdagi parlament saylovlarida qatnashishi mumkinligiga ishonch bildirgan edi.
Biroq 7-iyul kuni, Britaniya hukumati a’zolarining ommaviy iste’foga chiqishi fonida, u konservatorlar partiyasi rahbari va bosh vazir lavozimlarini tark etishini e’lon qildi. Jonson partiya yangi yetakchini saylamaguncha o‘z lavozimida qoladi.
Buyuk Britaniya bosh vaziri lavozimi uchun kurash rejalarini, jumladan, sobiq sog‘liqni saqlash vaziri Sajid Javid, sobiq tashqi ishlar vaziri Jeremi Xant, sobiq moliya vaziri Rishi Sunak va boshqalar e’lon qildi.
Jonson o‘z faoliyatini Times va Daily Telegraph gazetalarida jurnalist sifatida boshlagan va bir necha yil Telegraph’ning Bryusseldagi byurosida ishlagan. U 2001-yilda Konservativ partiyadan deputat bo‘ldi va 2008-yilda London meri etib saylandi. 2016–2018-yillarda Jonson Tereza Mey kabinetida tashqi ishlar vaziri lavozimida ishlagan. U 2019-yilning yozida bosh vazir bo‘lgan edi.
Izoh (0)