O‘zbekistonda 9-iyul kuni Qurbon hayiti nishonlanadi. Aholi allaqachon qurbonlik uchun hayvonlar sotib olishni boshlab yuborgan. “Daryo” muxbiri Toshkent viloyatidagi kushxonalardan birida bo‘lib, qurbonlik uchun qanday mol va qo‘ylar so‘yilayotgani hamda ularning narxi haqida reportaj tayyorladi.
Ma’lum bo‘lishicha, qurbonlik uchun sotilayotgan mollar narxlari 18 million so‘mdan 40 million so‘mgacha bo‘lmoqda. Chorva bo‘yicha mutaxassis Behzod Abdullayevning aytishicha, bu yil chorva hayvonlariga bo‘lgan talab ancha yuqori.
“Mollar narxlari har xil. Masalan, qurbonlik uchun so‘yish mumkin bo‘lgan kichikroq va go‘shti kamroq mollar 18-20 million so‘m atrofida sotiladi. O‘rtachalari 25-30 million so‘m, katta buqalar 35-40 million so‘mdan sotilmoqda. Bu yerdagi mollarning hammasi yoshiga to‘lgan.
Ular kamida 6-8 oy boqilgan. Barchasi qurbonlikka so‘yilishga tayyor. Ertaga kushxonada 200 ta mol so‘yiladi. Bu yil mol va qo‘ylarga bo‘lgan talab o‘tgan yilgidan ancha yuqori bo‘lmoqda. Chunki karantin emas”, — dedi u.
Tadbirkor va qassob O‘lmas Turonov qo‘ylar narxlari haqida ma’lumot berdi.
“Qo‘ylarimiz narxi kichik-kattaligiga qarab belgilanyapti. Narxlar 1 million so‘mdan 5 million so‘mgacha. Sotuvdagi qo‘ylar orasida 2 oydan 4 oygacha boqilganlari bor.
Kuniga 10-15 ta qo‘y sotayotgan edik. Lekin ertaga Qurbon hayiti bo‘lgani uchun ko‘proq sotilmoqda. Ya’ni kuniga 50 tagacha qo‘y sotilyapti. Agar xaridor 10 ta qo‘y sotib olsa, unga 1 ta qo‘y bonusga, sovg‘a qilib berilyapti. Hayitga, nasib bo‘lsa, bir o‘zim 30-50 ta qo‘y so‘yaman. Kushxonada esa ertaga (9-iyul kuni) jami 500 ta so‘yiladi. Qo‘ylar Qashqadaryodan olib kelingan. Ularni xonadonda boqamiz. Bu yerda o‘zimning 100 ta qo‘yim bor”, — dedi qassob.
O‘lmas Turonovning aytishicha, og‘irligi 100 kilodan yuqori bo‘lgan qo‘ylardan biri 1000 dollarga sotilgan va uni sotib olgan odamga bitta kichikroq qo‘y sovg‘a qilingan.
Izoh (0)