Joriy yil 4-iyulda O‘zbekiston tovar-xomashyo birjasining birja savdolari orqali ilk bor GTL dizel yoqilg‘isi sotildi, deb xabar bermoqda “O‘zRTXB” axborot xizmati.
Birja savdolarida mazkur sintetik suyuq yoqilg‘ining sotuvchisi sifatida Uzbekistan GTL zavodi ishtirok etdi.
Sotuvchi korxona tomonidan ochiq birja savdolariga 660 tonna GTL dizel yoqilg‘isi qo‘yildi va hammasi sotildi.
O‘tkazilgan birja savdo natijalariga ko‘ra sintetik dizel yoqilg‘isining o‘rtacha narxi mahsulotning bir tonnasi uchun 15,3 mln so‘mni tashkil qildi.
Birjada GTL dizel bo‘yicha shakllangan kotirovka uning boshlang‘ich narxiga (15 mln so‘m) nisbatan 1,8 foizga o‘sdi.
GTL dizeli yuqori texnik ko‘rsatkichlarga ega va tarkibida oltingugurt miqdori deyarli nolga teng bo‘lgan, atmosferaga juda kam miqdorda ifloslantiruvchi moddalarni chiqaruvchi mahsulotdir.
GTL dizelini dizel dvigatellarida sof holda yoki uni aralashtirish uchun xomashyo sifatida qo‘llash mumkin.
Avvalroq O‘zbekiston neft-kimyo sanoati tarixida sintetik neftning birinchi partiyasi ishlab chiqarilgani haqida xabar berilgandi.
Izoh (0)