Belarus prezidenti Aleksandr Lukashenko yaqin kelajakda Markaziy Osiyoda ikki kuch hukmronligi uchun kurash olib borilishi mumkinligini aytdi: bir tomondan AQSH va Yevropa Ittifoqi, ikkinchi tomondan Xitoy. Bu fikrni davlat rahbari Minskda Mustaqillik kuni munosabati bilan o‘tkazilgan tantanali yig‘ilishda bildirdi.
Yil boshida Lukashenko Qozog‘istondagi yanvar voqealarini sharhlar ekan, O‘zbekiston provokatsiyalar uchun navbatdagi nuqtaga aylanishi mumkinligini bashorat qilgan edi.
“Biz o‘zbeklarga ko‘p faktlarni keltirdik, sammitlardan birida buni aytganimda ular mendan qandaydir ranjidi. Kecha nima bo‘ldi? Qoraqalpog‘iston Respublikasi, O‘zbekistonning qariyb yarmi, ...go‘yoki konstitutsiyada nimadir noto‘g‘ri va u bosh ko‘tardi. Yo‘q! O‘zbekiston chayqalishni boshladi. Va bugun bu ishlarda chet elliklarning qo‘li borligi aytilmoqda”, — dedi Belarus rahbari.
“Markaziy Osiyo, xuddi biz kabi ikki olov orasida qoldi: bir tomondan, yevropaliklar, amerikaliklar, ikkinchi tomondan, Markaziy Osiyoning omon qolishiga katta yordam berayotgan Xitoy. Buning belgilari allaqachon paydo bo‘lgan”, — dedi Lukashenko 2-iyul kungi bayonotida.
2022-yilning yanvar oyida KHSHT yig‘ilishida Lukashenko Qozog‘istonda bo‘lib o‘tgan tartibsizliklardan O‘zbekiston hushyor bo‘lishi kerakligini aytgandi.
“Qozog‘istondagi vaziyatdan, avvalo, O‘zbekiston hushyor bo‘lishi kerak, aks holda, bizdagi ma’lumotlarga ko‘ra, to‘polon tashkilotchilarining nigohi, jumladan, O‘zbekistonga qaratilgan”, — degan Belarus rahbari.
Lukashenkoning bu gaplarini o‘zbek blogerlari O‘zbekistonga bosim o‘tkazish deb qabul qildi. Tarmoq faollariga ko‘ra, bu — O‘zbekistonni KHSHTga tortish harakatining navbatdagi, ochiq-oydin yangragan belgisidir. Tahlilchilar uning ogohlantirishi o‘rinsiz ekani, O‘zbekistonda Qozog‘istondagi kabi qo‘shhokimiyat yo‘qligini ta’kidlagan.
Izoh (0)