Rossiyaning Belgorod shahri markazida 3-iyulga o‘tar kechasi sodir bo‘lgan ketma-ket portlashlar oqibatida kamida besh kishi halok bo‘ldi, yana to‘rt kishi jarohatlandi, shuningdek, 50 ga yaqin turar joy binolari vayron bo‘ldi. Bu haqda Meduza xabar berdi.
Belgorod viloyati gubernatori Vyacheslav Gladkovning so‘zlariga ko‘ra, ertalab soat uchlarda shaharda bir qator baland tovushlar eshitilgan, shundan so‘ng Mayakovskiy ko‘chasidagi uylardan biri yonib ketgan. “Hodisa sabablari o‘rganilmoqda, havo hujumidan mudofaa tizimi ishlagan bo‘lishi mumkin”, — deb yozdi u Telegram kanalida.
Mahalliy aholi ijtimoiy tarmoqlarda yong‘in tasvirlari, shuningdek, osmonda, keyin esa yerda yuz bergan portlash videolarini joylashtirgan.
Gladkovning so‘zlariga ko‘ra, portlashlarda Mayakovskiy, Michurin, Chumichov, Popov va Pavlov ko‘chalari bo‘ylab jami 11 ta ko‘p xonadonli uy va 39 ta xususiy turar joy binolari shikastlangan. Shu bilan birga, ulardan beshtasi butunlay vayron bo‘lgan. Viloyat hokimi fuqarolarga uy-joyni tiklashda barcha zarur yordamni ko‘rsatishga va’da berdi.
Jarohatlanganlar orasida ikki kishi – o‘n yoshli bola va og‘ir ahvoldagi erkak kasalxonaga yotqizilgan. Hodisada uch kishi halok bo‘lgani rasman tasdiqlangan. Baza Telegram-kanalining yozishicha, Mayakovskiy ko‘chasidagi xususiy uylardan birida vayronalarni tozalash chog‘ida yana ikki o‘lik topilgan. Ushbu ma’lumotning rasmiy tasdig‘i yo‘q.
Ukrainada urush boshlanganidan beri Belgorod chegara hududi bir necha bor o‘qqa tutildi, mahalliy hokimiyat ma’lumotlariga ko‘ra, bu Ukraina tomonidan amalga oshirilgan. Viloyat hududida va Rossiyaning Ukraina bilan chegaradosh boshqa bir qator viloyatlarida terrorchilik xavfining “sariq” darajasi e’lon qilingan.
Izoh (0)