Buxoroda to‘qqiz yildan buyon turli bahonalar bilan ikki nafar farzandi ta’minoti uchun aliment to‘lovidan bosh tortib kelgan ota 30,7 million so‘m qarzdorligini to‘lashga majbur bo‘ldi. Bu haqda “Daryo”ga MIBning viloyat boshqarmasi axborot xizmati rahbari Ixtiyor Olimov xabar berdi.
Ta’kidlanishicha, G‘ijduvon tumanida yashovchi fuqaro B.A. turmush o‘rtog‘i F.B. bilan 2013-yil ajrashgan. Va shundan boshlab undan xotini foydasiga ikki nafar voyaga yetmagan farzandining moddiy ta’minoti uchun ish haqi va boshqa daromadlarining uchdan bir qismi miqdorida aliment undirish belgilangan. Biroq ota turli bahona va yashab turgan manzilidan vaqtincha chiqib ketishi vaji bilan ijro hujjati talablarini bajarishdan bo‘yin tovlab kelgan.
Davlat ijrochisi tomonidan uning aliment qarzdorligi qayta hisob-kitob qilinganda, joriy yil holatida 30,7 million so‘mni tashkil qilgan.
Qarzdor aliment to‘lashdan bo‘yin tovlab kelgani sabab unga nisbatan Ma’muriy javobgarlik to‘g‘risidagi kodeksga ko‘ra to‘plangan hujjatlar Ma’muriy ishlari bo‘yicha G‘ijduvon tuman sudiga yuborilgan.
Sud jarayonida qarzdor voyaga yetmagan farzandlarining moddiy ta’minoti uchun 30,7 million so‘m miqdordagi aliment pullarini to‘lashga majbur bo‘lgan.
“Aks holda unga nisbatan ma’muriy qamoq jazosi tayinlanishi mumkin edi. Biroq o‘talgan jazo muddati ham qarzdorning to‘lovdan ozod bo‘lishini ta’minlamaydi”, — dedi Ixtiyor Olimov.
Izoh (0)