Avval xabar berilganidek, 25-iyun kuni O‘zbekiston Konstitutsiyasiga o‘zgartishlar kiritish to‘g‘risidagi qonun loyihasi jamoatchilik muhokamasiga qo‘yildi.
Unga ko‘ra, umumiy o‘rta ta’lim olish majburiy qilib belgilanmoqda. “Bepul umumiy o‘rta ta’lim olish davlat tomonidan kafolatlanadi. Umumiy o‘rta ta’lim majburiydir. Maktab ishlari, maktabgacha ta’lim va tarbiya davlat nazoratidadir” deb yozilmoqda 41-moddaga kiritilayotgan o‘zgarishda.
Ushbu qo‘shimchalar prezident Shavkat Mirziyoyevning Konstitutsiya kuni bayrami munosabati bilan yo‘llangan tabrikda Konstitutsiyani isloh qilish bo‘yicha ko‘rsatib berilgan asosiy yo‘nalishlarning to‘qqizinchisi – “Uchinchi Renessansning to‘rt uzviy xalqasi bo‘lmish bog‘cha, maktab, oliy ta’lim va ilm-fan sohalarini rivojlantirish masalalarini konstitutsiyaviy darajada mustahkamlab qo‘yish”, degan taklifidan ham kelib chiqadi.
Kiritilayotgan o‘zgartirishlar Yangi O‘zbekiston taraqqiyot strategiyasining 4-yo‘nalishida ko‘rsatilgan xalq ta’limi sohasini rivojlantirish borasida o‘quv o‘rinlari sonini 6,4 mln.ga, nodavlat ta’lim tashkilotlar ulushini esa 8 %ga yetkazish, 699 nomdagi yangi darsliklar va mobil ilovalarni, elektron malaka oshirish platformasi uchun 769 ta videodars yaratish hamda 1-4-sinf o‘quvchilarini bepul ovqat bilan ta’minlash kabi vazifalarga muvofiq.
Ushbu qoidaning Konstitutsiya darajasida belgilanishi bolaning bepul umumiy o‘rta ta’lim olish huquqini kafolatlaydi.Mazkur qo‘shimchalar, davlat tomonidan nafaqat davlat ta’lim tashkilotlarini rivojlantirish uchun, shu bilan birga nodavlat yoki xusususiy ta’lim tashkilotlari yoxud davlat xususiy sheriklik asosidagi ta’lim tashkilotlarini rivojlantirish uchun sharoit yaratishi, ya’ni muhim qonunchilik hujjatlarini qabul qilish, subsidiyalar yoki imtiyozli kreditlar berishi kabi yo‘llar bilan yordam ko‘rsatishi belgilab qo‘yilmoqda.
Izoh (0)