Vudi Allen aktyor Alek Bolduinga bergan intervyusida odamlar kinoni asosan uyda o‘tirib tomosha qilayotgan striming-servislar davrida boshqa film suratga olishni istamayotganini ma’lum qildi, deb xabar beradi The Hollywood Reporter.
“Men ehtimol, yana bir film suratga olaman, lekin bu tuyg‘u u qadar o‘tkir bo‘lmaydi, chunki hozir kino yaxlit ta’sirga ega emas. Faoliyatimni boshlagan vaqtimda butun mamlakat kinoteatrlari bo‘ylab filmlar namoyish etilar va odamlar uni tomosha qilishga kelardi. Endilikda esa kartina to‘rt-olti hafta kinoteatrlarda namoyish etilyapti, keyin striming-servislarga berib yuborilmoqda”, — deydi Allen.
Aktyorning so‘zlariga ko‘ra, hozirda odamlarga uyda o‘tirish va o‘zining katta ekranida kino ko‘rish yoqadi — sifatli ovoz va tiniq tasvirda. “Kinobiznesga kelganimda bunday emasdi… Filmingni bir vaqtning o‘zida 500 kishi ko‘rayotganini bilish yoqimli edi”, — deya qo‘shimcha qiladi rejissor.
Allenning ta’kidlashicha, kinodagi so‘nggi ishiga aylanishi mumkin bo‘lgan kartinani u Parijda kuzda tasvirga olish niyatida. Hozircha kartinaning boshqa detallari oshkor etilmagan.
Eslatib o‘tamiz, 2014-yilda Toshkentda Vudi Allen haftaligi o‘tkazilgandi.
Izoh (0)