Rossiya prezidenti Vladimir Putin Rossiyaning valyutadagi tashqi qarzi bo‘yicha majburiyatlarni bajarishning vaqtinchalik tartibi to‘g‘risidagi farmonni imzoladi, deb yozadi Meduza.
Hujjatga muvofiq, davlat yevroobligatsiyalari bo‘yicha majburiyatlar to‘lov kuni ichki bozordagi kurs bo‘yicha rublda to‘langanidan keyin bajarilgan deb e’tirof etiladi. Hukumat o‘n kun ichida davlat obligatsiyalari egalariga to‘lovlarni amalga oshirish uchun jalb qilinadigan banklarni tanlashi kerak.
Rossiya davlat qarziga xizmat ko‘rsatish bilan bog‘liq muammolar AQSH, Yevroittifoq va boshqa mamlakatlar Ukrainadagi urush tufayli sanksiyalar doirasida Rossiyaning xalqaro zaxiralari bir qismini muzlatib qo‘yganidan keyin paydo bo‘ldi.
Aprelda Rossiya sanksiyalarga qaramasdan, yevrobondlar bo‘yicha ikki marta to‘lov qildi. Biroq 24-may kuni AQSH Moliya vazirligi Rossiyaga tashqi qarzga xizmat ko‘rsatish uchun to‘lovlarni dollarda amalga oshirish imkonini beruvchi litsenziyani uzaytirishdan bosh tortdi. Bu litsenziyasiz Rossiya Moliya vazirligi mamlakatdagi xalqaro obligatsiyalar egalariga, agar ular dollarda nominatsiya qilingan bo‘lsa, to‘lovlarni o‘tkaza olmaydi.
Rossiya Moliya vazirligi Rossiya gazi uchun to‘lov sxemasiga o‘xshash bo‘lgan mexanizm yordamida to‘lovlarni rublda amalga oshirishini ma’lum qildi. Bozorning g‘arblik ishtirokchilari buni to‘lov valyutasini kelishilmagan holda o‘zgartirish deb hisobladi va defolt e’lon qilishga tayyorlanayotganini ma’lum qildi. Rossiya moliya vaziri Anton Siluanovning so‘zlariga ko‘ra, Rossiyaga xavf solayotgan texnik defolt “iqtisodiyotga hech ham ta’sir qilmaydi”, mamlakatda esa davlat qarzi bo‘yicha to‘lovlar uchun valyuta va resurslar yetarli.
Izoh (0)