Ijtimoiy tarmoqlarda Farg‘ona viloyatida jarimani to‘lashga imkoniyati bo‘lmagan haydovchi o‘zini yoqib yuborgani aytilgan xabarlar tarqaldi. Viloyat IIB holatga munosabat bildirib, haydovchiga nisbatan jarima asosli ravishda belgilanganini ma’lum qildi.
Internetda “GAIning aytishicha, bir qizchaga yo‘l bermagani uchun shuncha vahima. Haydovchining aytishicha, ‘nachalnik GAI’ni quvib o‘tgani uchun shuncha vahima” sarlavhali videoxabar Farg‘ona viloyati IIB tomonidan o‘rganib chiqilgan.
Ma’lum bo‘lishicha, 2022-yil 15-fevral kuni Quva tumani IIB YHXG katta inspektori X.SH. va YPX katta inspektori M.A. tumanning G‘alaba ko‘chasida Nexia-2 avtomobil haydovchisi yo‘lning qatnov qismini kesib o‘tayotgan piyoda hamda boshqa transport vositalarining harakatiga raxna solgan holatda harakatlanganini ko‘rib, uning ortidan borib to‘xtash ishorasi orqali to‘xtatgan.
Haydovchi M.T.ga sodir etgan qoidabuzarligini tushuntirib, tegishli hujjatlarini taqdim etishini so‘ralgan vaqtida, u hujjatlarni taqdim etmasdan, ichki ishlar organlari xodimlarining qonuniy talablarini bajarmagan. Shundan so‘ng M.T.ga nisbatan yo‘l harakati qoidalarini buzgani yuzasidan elektron bayonnoma rasmiylashtirilib, transport vositasi Quva tumanidagi jarima maydonchasiga olib kirilgan.
Haydovchi M.T. jarima maydonchasi oldida ichki ishlar organlarining qonuniy talablarini bajarmasdan, ularning sha’ni va qadr-qimmatini kamsituvchi harakatlarini sodir etishda davom etgani uchun profilaktika inspektorlari tomonidan Ma’muriy javobgarlik to‘g‘risidagi kodeksning 183- (mayda bezorilik) va 194-moddalari (ichki ishlar organlari xodimining qonuniy talablarini bajarmaslik) tartibida bayonnoma rasmiylashtirilgan.
Bundan tashqari, videoxabarda aytilishicha M.T. go‘yoki yo‘l harakati qoidasini buzganlik uchun tayinlangan jarima qiymatini to‘lashga imkoniyati bo‘lmaganidan achchiqlanib, o‘z yashash xonadonida ustidan benzin quyib, yoqib yuborib, o‘z joniga suiqasd qilgani aytilgan. Lekin aloqador xodimlarning xatti-harakatlari yuzasidan o‘tkazilgan xizmat tekshiruvi davomida Nexia-2 rusumli avtomobil jarima maydoniga asosli joylashtirilgani, tuzilgan ma’muriy bayonnomalar asosli ekanligi keltirib o‘tilgan.
O‘tkazilgan xizmat tekshiruvi xulosasining nusxasi va to‘plangan hujjatlar 2022-yil 10-mart kuni huquqiy baho berish uchun Quva tumani prokuraturasiga yuborilgan.
Avvalroq Qarshida Nexia oynasidan oyoqlarini chiqarib harakatlangan mast ayol jarimaga tortilgani, Sirdaryoda mashina oynasidan oyog‘ini chiqarib harakatlangan haydovchi jazolangani to‘g‘risida xabar berilgandi.
Izoh (0)