O‘zbekistonda omonat bo‘yicha o‘rtacha foiz stavkalari e’lon qilindi

Markaziy bank O‘zbekiston banklaridagi omonatlar bo‘yicha ma’lumot berdi.

Tizimdagi top-10 bankning yuqori foiz stavkalari bo‘yicha navbatdagi monitoring amalga oshirildi.

Unga ko‘ra, 2022-yil 1-iyun holatida banklardagi aholi omonatlarining yuqori foiz stavkalari 21-23 foiz atrofida shakllanib, o‘rtacha 21,8 foizni tashkil qildi.

Aholi omonatlari bo‘yicha yuqori foiz stavkalarini aniqlashda barcha doimiy va potensial mijozlar uchun ommabop, cheklovlar va oldindan shartlar mavjud bo‘lmagan bank omonatlarining yuqori stavkalari hisobga olindi.

Alohida toifadagi mijozlar (pensioner, bolalar, talabalar va boshqalar) uchun mo‘ljallangan hamda kapitalizatsiya qilinadigan omonatlar hisobga olinmagan.

Avvalroq Markaziy bank kreditlar to‘g‘risida fuqarolardan kelib tushgan murojaatlarga munosabat bildirgandi.