May oyida O‘zbekiston va Ukraina o‘rtasidagi savdo aylanmasi hajmi 9,9 million dollarni tashkil qildi. Bu Davlat statistika qo‘mitasi ma’lumotlarida qayd etildi.
Taqqoslash uchun, aprel oyida u 7,3 million dollarni tashkil qilgan edi.
Savdo jonlanganiga qaramay, umumiy hajm o‘tgan yilning mos davriga nisbatan 73,6 million dollarga kam.
Natijada Ukraina O‘zbekistonning savdo hamkorlari orasida 19-o‘rinni egalladi. O‘tgan yilning may oyida mamlakat 9-o‘rinda edi.
Bularning barchasini Rossiyaning Ukrainaga fevral oyi oxiridan beri davom etayotgan harbiy harakatlari bilan izohlasa bo‘ladi.
Urush boshlangunga qadar Ukraina O‘zbekistondan, asosan, meva-sabzavot va to‘qimachilik mahsulotlari, azotli va kaliyli o‘g‘itlar, etilen polimerlari, rux xomashyosi va avtomobil xarid qilgan.
Avvalroq BMT Ukraina g‘allasi bo‘yicha muzokaralar to‘xtagani sababli ochlik xavfidan ogohlantirgani haqida xabar berilgandi.