Tehron Eron atomi bo‘yicha Birgalikdagi keng qamrovli harakatlar rejasi (BKQHR)ni qayta tiklash hali ham mumkin, deb hisoblaydi va AQSHni yangi sanksiyalar qo‘llashdan ogohlantiradi, deya xabar qildi dushanba kuni Eronning Tasnim axborot agentligi mamlakat Tashqi ishlar vazirligiga tayanib.
“Amerikaning barcha qonunbuzarliklari va Tramp yondashuvining davom etayotganiga qaramay, bu poyezd haligacha jo‘nab ketgani yo‘q”, — degan Eron TIV matbuot kotibi Said Xatibzoda.
Uning ta‘kidlashicha, Eronning BKQHR qaytishining sharti AQSH tomonidan qo‘yilgan barcha sanksiyalarni bekor qilish va muammolarni sanksiyalar bosimi bilan emas, balki muzokaralar yo‘li bilan hal qilishni qayta tanlashdir.
Xatibzoda, shuningdek, agar AQSH Eronga qarshi qo‘shimcha cheklov choralarini qo‘llasa, bu BKQHR atrofidagi vaziyatni yanada yomonlashtirishi haqida ogohlantirdi.
2015-yilda Eron va “oltilik” davlatlari – BMT Xavfsizlik Kengashining besh doimiy a’zosi va Germaniya – Birgalikdagi keng qamrovli harakatlar rejasini (BKQHR) tuzdi, unga ko‘ra Tehron o‘zining yadroviy dasturini faqat tinch maqsadlarda rivojlantirishni cheklashi kerak. Maxsus shartlar, jumladan, uranni boyitish darajasi, sanktsiyalarni bosqichma-bosqich olib tashlash evaziga MAGATE inspektorlarini Eron yadroviy obyektlariga kiritish bo‘yicha kelishib olingan. AQShning sobiq prezidenti Donald Tramp 2018-yilda AQShni BKQHRdan bir tomonlama chiqardi va Eronga qarshi sanksiyalarni qayta joriy qildi, bu esa Tehronni kelishuvning ayrim shartlaridan voz kechishga majbur etdi.
Keyinchalik, 2021-yilning aprelidan dekabrigacha Eron va bir qator jahon kuchlari Venada BKQHRni tiklash bo‘yicha bir necha bosqichli muzokaralar o‘tkazdi. AQSH ularda bevosita ishtirok etmadi.
So‘nggi haftalarda AQSH va boshqa G‘arb davlatlari rasmiylari Eronning BKQHRga qaytish bo‘yicha kelishuvga erishish uchun vaqti kam qolayotgani haqida tez-tez ogohlantirmoqda.
Izoh (0)