Shavkat Mirziyoyevning “O‘zbekiston Respublikasi prezidentining tashqi siyosat masalalari bo‘yicha maxsus vakili lavozimini joriy etish to‘g‘risida”gi farmoni qabul qilindi. Hujjat matni “Lex.uz”da e’lon qilindi.
Qayd etilishicha, quyidagilar maxsus vakilning asosiy vazifalari hisoblanadi:
- O‘zbekiston prezidentining tashqi siyosat sohasidagi xalqaro va mintaqaviy tashabbuslarining samarali ilgari surilishini ta’minlash;
- O‘zbekiston prezidentiga mamlakat tashqi siyosatining ustuvor yo‘nalishlari va xalqaro hamkorlikni mustahkamlash bo‘yicha aniq takliflar kiritish;
- global va mintaqaviy muammolar, tashqi siyosat masalalari bo‘yicha O‘zbekiston pozitsiyasini yetkazish maqsadida xorijiy davlatlar va xalqaro tashkilotlarning rasmiy vakillari bilan doimiy ishchi aloqalarini o‘rnatish;
- O‘zbekiston prezidentining alohida topshiriqlariga asosan tashqi siyosat va xalqaro hamkorlikning dolzarb masalalari bo‘yicha maxsus missiyalarni bajarish;
- O‘zbekiston prezidenti ishtirokida o‘tkaziladigan xalqaro tadbirlar va uchrashuvlarni tayyorlashda ko‘maklashish.
Eslatib o‘tamiz, prezidentning tashqi siyosat masalalari bo‘yicha maxsus vakili lavozimiga Abdulaziz Komilov tayinlangan. Sobiq tashqi ishlar vaziri, bundan tashqari, O‘zbekiston prezidenti huzuridagi Xavfsizlik kengashi kotibining tashqi siyosat va xavfsizlik masalalari bo‘yicha o‘rinbosari lavozimida faoliyat yuritmoqda.
Izoh (0)