O‘z uylarini tark etishga majbur bo‘lgan bolalar soni 2021-yil oxirida Ikkinchi jahon urushi tugaganidan keyingi eng yuqori ko‘rsatkichga — 36,5 millionga yetdi, deb xabar bermoqda UNICEF.
“UNICEF hisob-kitoblariga ko‘ra, 2021-yil oxiri holatiga nizolar, zo‘ravonliklar va boshqa inqirozlar oqibatida rekord sondagi bolalar — 36,5 million kishi o‘z uylarini tark etishga majbur bo‘lgan, bu Ikkinchi jahon urushi tugaganidan buyon eng yuqori ko‘rsatkichdir”, — deyiladi tashkilot press-relizida.
Ta’kidlanishicha, ko‘rsatilgan raqam chet elda boshpana qidirayotgan 13,7 million bolani va 22,8 million zo‘rlab ko‘chirilgan voyaga yetmagan shaxslarni o‘z ichiga oladi: ular o‘z uylarini tark etishga majbur bo‘lgan, ammo shu bilan birga o‘z mamlakatlari hududida qolmoqda.
Ayni vaqtda UNICEF ekspertlari tabiiy ofatlar oqibatida qochqinlikka mubtalo bo‘lgan bolalarni hisobga olgani yo‘q.
Umuman olganda, dunyoda qochqinlar va zo‘rlab ko‘chirilgan shaxslar soni so‘nggi o‘n yil ichida ikki marta oshgan, ularning yarmidan ko‘pini bolalar tashkil qiladi. Bunday bolalarning uchdan bir qismi Sahroi Kabirdan janubdagi Afrika mamlakatlarida, to‘rtdan bir qismi Yevropa va Markaziy Osiyoda, 13 foizi Yaqin Sharq va Shimoliy Afrikada yashaydi, deyiladi UNICEF xabarida.
Avvalroq BMT migratsiya inqirozi va Ukrainadagi urush sabab yana qochoqlarning halokatli ahvoliga e’tibor qaratgan edi. Tashkilotning yillik hisobotiga ko‘ra, dunyodagi majburiy qochqinlar soni allaqachon 90 millionga yaqinlashgan.
Izoh (0)