Respublika tez tibbiy yordam markazi xodimlarining malakasini oshirish va qayta tayyorlash maktabi tashkil etiladi

“Aholiga tez tibbiy yordam ko‘rsatish tizimini takomillashtirish to‘g‘risida”gi prezident qaroriga ko‘ra, Sog‘liqni saqlash vazirligi huzuridagi Respublika shoshilinch tibbiy yordam o‘quv-mashg‘ulot markazi Respublika tez tibbiy yordam markazi xodimlarining malakasini oshirish va qayta tayyorlash maktabi etib qayta tashkil etiladi. Bu haqda SSV matbuot xizmati xabar berdi.

Ma’lum qilinishicha, ushbu maktab Respublika tez tibbiy yordam markazi tasarrufiga o‘tkaziladi.

Maktab tez tibbiy yordam xizmati xodimlarining malakasini oshirish va qayta tayyorlash uchun ajratilgan davlat budjeti mablag‘lari va qonunchilik bilan taqiqlanmagan boshqa manbalar hisobidan moliyalashtiriladi.

Tez tibbiy yordam xizmatini tashkil etish va raqamlashtirish uchun Axborot-kommunikatsiya texnologiyalarini rivojlantirish jamg‘armasi mablag‘lari hisobidan kamida 85 milliard so‘m miqdordagi mablag‘ Sog‘liqni saqlash vazirligi huzuridagi Tez tibbiy yordamni rivojlantirish jamg‘armasiga yo‘naltirilishi belgilangan.

Jahon banki shoshilinch xizmatlarni rivojlantirish loyihasi doirasida 5 million dollar miqdoridagi mablag‘lar tez va shoshilinch tibbiy yordamni raqamlashtirish tadbirlariga yo‘naltiriladi.

Sog‘liqni saqlash muassasalarining eskirgan va foydalanilmayotgan avtotransport vositalarini kimoshdi savdolarida sotishdan tushgan mablag‘lar tez tibbiy yordam xizmati avtoparkini yangilash maqsadlari uchun Sog‘liqni saqlash vazirligi huzuridagi Tez tibbiy yordamni rivojlantirish jamg‘armasi hisob raqamiga yo‘naltiriladi.

Shuningdek, Sog‘liqni saqlash vazirligiga tez tibbiy yordam bo‘yicha elektron avtomatlashtirilgan boshqaruv hamda yagona qo‘ng‘iroqlarni qabul qilish tizimlarini respublikaning barcha hududlarida bosqichma-bosqich joriy etish uchun Toshkent shahrida mazkur tizimlarni joriy qilishga jalb qilingan tizim integratori bilan to‘g‘ridan to‘g‘ri shartnoma tuzishga ruxsat beriladi.

Eslatib o‘tamiz, Shavkat Mirziyoyev 5-may kuni shoshilinch va tez tibbiy yordam sifatini yaxshilash masalalariga doir videoselektor yig‘ilishi o‘tkazgan. Unda tez tibbiy yordam sohasi oldida turgan vazifalarni belgilab berib, jumladan, tumanlarda chaqiruvlarni qabul qilish dispetcherlik xizmati tugatilib, viloyatlarda yagona Сall-markaz tashkil etilishini aytgandi.