“Aholiga tez tibbiy yordam ko‘rsatish tizimini takomillashtirish to‘g‘risida”gi prezident qarori qabul qilingani to‘g‘risida xabar berilgandi. SSV matbuot xizmatining ma’lum qilishicha, qarorga muvofiq hududiy tibbiyot muassasalarida bemorlarni og‘irlik darajasi bo‘yicha saralaydigan shoshilinch qabul bo‘limlari tashkil etiladi.
Qarorga muvofiq, 2022-yil yakuniga qadar mavjud shifo o‘rinlari va shtat birliklari doirasida:
- Markaziy tuman (shahar) shifoxonalaridagi shoshilinch tibbiy yordam bo‘limlaridagi shifo o‘rinlari pediatriya, terapiya va xirurgiya bo‘limlari tarkibiga o‘tkazilib, bemorlarni og‘irlik darajasi bo‘yicha saralaydigan (triaj) tun-u kun ishlaydigan shoshilinch qabul bo‘limlari;
- Respublika shoshilinch tibbiy yordam ilmiy markazi, uning hududiy filiallari hamda barcha tumanlararo qo‘shma shikastlanishlar va o‘tkir qon-tomir kasalliklari markazlarida shoshilinch qabul bo‘limlari;
- Toshkent shahrining Shayxontohur tumanidagi 1-son, Yashnobod tumanidagi 4-son, Yunusobod tumanidagi 7-son shahar klinik shifoxonalari hamda Uchtepa tumanidagi shahar tez yordam shifoxonasi tarkibida alohida yuridik maqomga ega bo‘lmagan tumanlararo qo‘shma shikastlanishlar va o‘tkir qon-tomir kasalliklari markazlari tashkil etiladi.
Yangi tashkil etilayotgan tumanlararo qo‘shma shikastlanishlar va o‘tkir qon-tomir kasalliklari markazlarini jihozlash uchun Jahon bankining “O‘zbekistonda COVID-2019 koronavirusi infeksiyasiga qarshi kurashish bo‘yicha shoshilinch choralarni ko‘rish” loyihasi doirasida iqtisod qilingan mablag‘lar yo‘naltiriladi.
Qarorda belgilanishicha, 2022-yil 1-sentabrga qadar shoshilinch qabul bo‘limlarining yangilangan shtat normativlari tasdiqlanadi. 2022-yil 1-dekabrga qadar markaziy tuman (shahar) shifoxonalarining shifo o‘rinlari fondi aholi soni va kasalliklar yo‘nalishlaridan kelib chiqib qayta ko‘rib chiqiladi.
Eslatib o‘tamiz, Shavkat Mirziyoyev 5-may kuni shoshilinch va tez tibbiy yordam sifatini yaxshilash masalalariga doir videoselektor yig‘ilishi o‘tkazgan. Unda tez tibbiy yordam ko‘rsatish bir tuman hududida emas, masofaga qarab butun viloyat bo‘yicha yo‘lga qo‘yilishi aytilgandi.
Izoh (0)