Ilon Mask “kriptopiramida” yaratishda ayblanib sudga berildi

Amerikalik Kit Jonson Ilon Mask va uning SpaceX va Tesla kompaniyalarini sudga berdi, deb yozadi “RBK”. Uni “Dogecoin moliyaviy piramidasi” bilan aldashgan — aybdorlar ushbu kriptovalyuta narxini oshirish uchun “reket” bilan shug‘ullanadi.

“Javobgarlar aslida hech qanday qiymatga ega bo‘lmagan Dogecoin’ni qonuniy investitsiya deb aldamoqda”, — deyiladi Jonson Manxetten federal sudiga kiritgan shikoyatda.

Da’vogar 86 milliard dollar miqdorida zarar qoplanishini, 172 milliard dollar miqdorida uch karra zararni hamda Mask va uning kompaniyalariga Dogecoin’ni targ‘ib qilishni taqiqlaydigan va uning savdosini qimor o‘yini deb e’lon qiladigan hujjatni talab qilmoqda. Jonson 2019-yil aprelidan buyon Dogecoin savdosi tufayli pullarini yo‘qotgan odamlarga vakillik qilmoqchi.

Bloomberg ma’lumotlariga ko‘ra, Dogecoin narxi birjada 16-iyun kuni 0,05 dollar darajasida saqlanib turgan, bu yil u taxminan 67 foizga tushgan. O‘tgan yilning mayida u 0,7 dollarlik cho‘qqiga chiqib, keyin pasayishni boshlagandi.

Yanvarda Tesla kompaniyasi aksessuarlarga ushbu kriptovalyuta bilan to‘lash imkoniyatini joriy qildi. Bungacha Mask Dogecoin to‘lovlar uchun bitkoindan ko‘ra ko‘proq to‘g‘ri kelishini aytgandi. Uning so‘zlariga ko‘ra, altkoin tarmog‘idagi tranzaksiya birinchi kriptovalyuta bilan operatsiyalarga qaraganda tezroq va arzonroq bo‘ladi.

Kriptovalyutalarni Bill Geyts ham bir necha marta tanqid qilgandi. Xususan, u NFT va kriptovalyutalarni firibgarlik deb atadi. 14-iyun kuni bo‘lib o‘tgan iqlim konferensiyasida yana raqamli aktivlarni “Kattaroq ahmoq” nazariyasi asosida tanqid qildi. Nazariya o‘zgarmas tokenlar kabi kriptovalyuta loyihalarini rad etadi.

Bill Geyts ilgari kriptovalyutani tanqid qilib, o‘tgan yili Ilon Mask bilan Bitkoin chakana investorlar uchun juda xavfli ekanligi va uni qazib olishning atrof-muhitga zarari haqida bahslashgan edi.