Toshkent viloyati Chinoz tumanida yo‘l harakati xavfsizligi bo‘limi boshlig‘iga pora taklif qilgan shaxs daliliy ashyo bilan ushlandi. Bu haqda viloyat Ichki ishlar bosh boshqarmasi xabar qildi.
Qayd etilishicha, IIV Shaxsiy xavfsizlik bosh boshqarmasi Toshkent viloyati bo‘yicha boshqarmasi va prokuratura xodimlari hamkorligida tezkor tadbir o‘tkazilgan. Tadbir davomida fuqaro M.J. (2000-yilda tug‘ilgan, Surxondaryo viloyatida yashovchi) tuman YHXB boshlig‘iga pora tariqasida 1,5 million so‘m taklif qilgan. U 1 million so‘mni berayotgan vaqtida daliliy ashyo bilan ushlangan.
Aniqlanishicha, ushbu haydovchi bir kun avval o‘zining Cobalt avtomobilida Chinoz tumani hududida harakatlanib ketayotgan vaqtida YPX xodimining qonuniy talabiga bo‘ysunmagan. Qoidabuzarligi sabab avtomobil jarima maydoniga qo‘yilgan.
Haydovchi esa xodimdan pora evaziga ma’muriy bayonnomani uning foydasiga hal qilishni va avtomashinasini jarima maydonidan olib chiqib berishini so‘ragan.
Holat yuzasidan Jinoyat kodeksining 211-moddasi (pora berish) 1-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.
Avvalroq Chiroqchi tuman YHXB boshlig‘i 130 ming so‘m pora bilan qo‘lga olingani haqida xabar berilgandi.
Mavzuga doir:
- Andijonda raqamsiz va hujjatlarsiz harakatlangan Nexia-3 haydovchisi YPX xodimiga 300 dollar berayotganda qo‘lga olindi (video)
- Toshkent viloyatida avtomashinasini jarima maydonchasidan chiqarib berishni so‘rab, YPX xodimiga 5 mln so‘m pora taklif qilgan haydovchi qo‘lga olindi
- Samarqandda YPX inspektoriga 600 ming so‘m pora berishga uringan fuqaro qo‘lga olindi
Izoh (0)