Tojikiston iqtisodiy rivojlanish va savdo vaziri o‘rinbosari Abdurahmon Abdurahmonzoda va O‘zbekiston investitsiyalar va tashqi savdo vaziri o‘rinbosari Badriddin Obidov O‘zbekistonning Jahon savdo tashkilotiga a’zo bo‘lish jarayonini muhokama qildi.
Uchrashuv 15-iyun kuni Jenevada o‘z ishini yakunlagan JST vazirlarining uch kunlik konferensiyasi doirasida bo‘lib o‘tdi.
O‘zbekistonga milliy iqtisodiyot manfaatlarini hisobga olgan holda JSTga a’zo bo‘lish jarayonida Tojikiston tajribasidan foydalanish taklif qilindi, deya xabar qildi Tojikiston Iqtisodiy rivojlanish va savdo vazirligi matbuot xizmati.
Shuningdek, xabarda “O‘zbekiston va Tojikiston ikki tomonlama o‘zaro manfaatli savdo-iqtisodiy hamkorlikni yanada mustahkamlashga tayyor ekanliklarini tasdiqladilar”, deya qo‘shimcha qilinadi.
O‘zbekistonning JSTga to‘la huquqli a’zo bo‘lish uchun birinchi so‘rovi 1994-yilda berilgan. Biroq ma’lum shartlarni bajarishdan iborat bo‘lgan a’zolik jarayoni bir necha yillarga cho‘zilgan, bu birinchi navbatda, mamlakatning birinchi prezidenti Islom Karimov davrida O‘zbekistonning yopiq bo‘lgani bilan izohlanadi.
2017-yil, Shavkat Mirziyoyev hokimiyatga kelganidan so‘ng a’zolikka kirish jarayoni qayta tiklandi.
O‘zbekiston bosh vaziri o‘rinbosari Sardor Umurzoqov joriy yilning 14-iyun kuni JST konferensiyasida so‘zlagan nutqida pandemiyaning salbiy oqibatlari tufayli tashkilotga a’zo bo‘lish jarayoni murakkablashganini ta’kidladi. U JSTga a’zo mamlakatlarni yanada moslashuvchan bo‘lishga chaqirdi va O‘zbekiston a’zolik jarayonini imkon qadar tezroq yakunlash niyatida ekanligini ma’lum qildi.
Tojikiston o‘n bir yillik muzokaralardan so‘ng 2013-yilning mart oyida JSTning 159-to‘liq a’zosiga aylangan edi.
Mavzuga doir:
- Sardor Umurzoqov JST rahbariyati bilan O‘zbekistonning tashkilotga a’zo bo‘lish masalasini muhokama qildi
- O‘zbekiston Jahon savdo tashkilotiga tez fursatda kirishi kutilmoqda
- “JST a’zosi bo‘lmasligimiz milliy va iqtisodiy manfaatlarimizni himoya qilish vositalaridan foydalanmayotganimizni bildiradi” — Sodiq Safoyev JST va YOII haqida
Izoh (0)