Oliy Majlisi Senati raisi, Odam savdosiga va majburiy mehnatga qarshi kurashish milliy komissiyasi raisi Tanzila Norboyeva boshchiligidagi O‘zbekiston delegatsiyasi AQSHga tashrifning ilk kunida AQSH rasmiylari, jamoatchilik va ishbilarmon doiralari vakillari bilan bir qator uchrashuv hamda muzokaralar o‘tkazdi. Bu haqda yuqori palata axborot xizmati xabar qildi.
Xususan, AQSH Davlat kotibining Fuqarolar xavfsizligi, demokratiya va inson huquqlari masalalari bo‘yicha o‘rinbosari Uzra Zeya bilan uchrashuv o‘tkazilgan. Unda tomonlar mamlakatda majburiy mehnatga barham berish, odam savdosining oldini olish va unga chek qo‘yish, qishloq xo‘jaligi sohasini isloh qilish, bu borada xalqaro tuzilmalar va fuqarolik jamiyati institutlari bilan o‘zaro hamkorlik qilish bo‘yicha ko‘rilayotgan huquqiy hamda institutsional chora-tadbirlarini muhokama qilgan.
Davlat kotibi o‘rinbosari majburiy mehnatga barham berish borasidagi sa’y-harakatlarni yuqori baholagan. O‘zbekiston nisbatan qisqa vaqt ichida yutuqlarga erishganini, Qo‘shma Shtatlar mamlakatdagi o‘zgarishlarning ijobiy dinamikasini qo‘llab-quvvatlashni davom ettirishga tayyorligini ta’kidlagan.
Uning fikricha, erishilgan yutuqlar to‘qimachilik sohasida jahon bozorida O‘zbekistonning raqobatbardoshligini mustahkamlaydi.
U.Zeya Davlat departamentining odam savdosi to‘g‘risidagi ma’ruzasida O‘zbekistonning o‘rni “nazorat ostidagi ro‘yxat”dan ikkinchi darajaga (Tier-2) ko‘tarilganini qutlagan. Ushbu harakatlar davom ettirilishiga umid bildirgan.
Uchrashuv yakunida tomonlar O‘zbekistonda mehnat munosabatlarini yanada yaxshilash uchun yangi loyihalarni amalga oshirishga kelishib olgan.
Shuningdek, 15-iyun kuni Senat raisi AQSH Kongressi Tashqi ishlar qo‘mitasidagi Osiyo, Tinch okeani va Markaziy Osiyo mintaqasi bo‘yicha quyi qo‘mita raisi, Kaliforniya shtatidan saylangan kongressmen-demokrat Ami Bera bilan uchrashgan. Uchrashuvda parlamentlararo hamkorlikni chuqurlashtirish istiqbollari muhokama qilingan.
Ami Bera O‘zbekistonda va Markaziy Osiyo mintaqasida xavfsizlikni ta’minlashda ko‘p qirrali hamkorlikni davom ettirishdan manfaatdorligini aytib o‘tgan. Uchrashuv yakunida O‘zbekiston—Amerika kun tartibining dolzarb masalalari yuzasidan parlamentlararo aloqalarni faollashtirish bo‘yicha kelishuvga erishilgan.
Bundan tashqari, Tanzila Norboyeva tashrif doirasida AQSHning Yevropada xavfsizlik va hamkorlik bo‘yicha komissiyasining (Xelsinki komissiyasi) katta siyosiy maslahatchisi Jenis Xelvig bilan suxbatlashgan. Uchrashuvda O‘zbekistonning so‘nggi yillarda majburiy mehnat va bolalar mehnatiga barham berish sohasidagi ishlariga e’tibor qaratilgan.
Xelsinki komissiyasi vakili bu borada Cotton Campaign xalqaro koalitsiyasi tomonidan o‘zbek paxtasiga qo‘yilgan boykot bekor qilingani muhim voqea ekanini aytib o‘tgan.
Izoh (0)