Markaziy Osiyodagi ko‘plab kambag‘al oilalar uchun Rossiya—Ukraina urushining uzoq davom etishi moliyaviy halokatga olib kelishi mumkin. Bu haqda Eurasianet xabar berdi.
Rossiyadagi sanksiyalar mehnat muhojirlarining uylariga jo‘natgan pul o‘tkazmalarining qulashiga olib kelmoqda, bu esa O‘zbekiston, Qirg‘iziston va Tojikistondagi ko‘plab xonadonlarga jiddiy zarar yetkazmoqda.
Jahon banki hisobiga ko‘ra, Rossiyada Markaziy Osiyodan kelgan 8 millionga yaqin muhojir bo‘lib, mamlakat asosiy manzil sifatida o‘z jilosini yo‘qota boshlagach, ular boshqa muqobil variant qidirmoqda.
Bu hafta Buyuk Britaniyadagi fermer xo‘jaliklari mahsulot tanlab olish va Brexit bilan bog‘liq ishchi kuchi tanqisligini to‘ldirish uchun Markaziy Osiyodan ishchilarni qabul qilmoqda.
Bitta fermer xo‘jaligi Nepal va Indoneziya kabi boshqa mamlakatlardan kelgan ishchilar bilan bir qatorda Tojikistondan 45 nafar ishchini meva terishga jalb qilgan.
Buyuk Britaniya Yevropa Ittifoqidan chiqish uchun ovoz berishidan va a’zo davlatlar fuqarolarining mamlakatda ishlash huquqini avtomatik ravishda olib tashlashidan oldin, Yevropa ishchilari ushbu mavsumiy ishlarni bajargan.
BBC xabariga ko‘ra, ko‘plab ukrainaliklar urush boshlangunga qadar bu bo‘shliqni to‘ldirgan.
Mamlakatda ishlash imkoniyati Qirg‘izistonning ham e’tiboridan chetda qolmadi — hukumat mart oyida Britaniyaga ishchilarni jo‘natish bo‘yicha shartnoma imzoladi.
Bunga ko‘plab qiziqish bildirganlar topildi — taklif qilingan mingta ish uchun 7 mingta ariza kelib tushdi.
O‘zbekiston uchun ham Buyuk Britaniyaning ishga qabul qilish dasturi manfaatli, chunki hukumat avvalroq Rossiyaga qaramlikni kamaytirish uchun mehnat migratsiyasi yo‘nalishlarini diversifikatsiya qilishni maqsad qilgan.
Jahon banki ma’lumotlariga ko‘ra, o‘tgan yili O‘zbekiston pul o‘tkazmalarining 56 foizini Rossiyadan olgan.
Qirg‘iziston va Tojikiston uchun umumiy ko‘rsatkich ancha yuqori bo‘lib, mos ravishda 82 va 76 foizni tashkil etgan.
O‘tgan yili Qirg‘iziston va Tojikistonda pul o‘tkazmalari YIMning uchdan bir qismiga teng bo‘lgan. O‘zbekiston uchun bu ko‘rsatkich 13 foizni tashkil etgan.
Jahon banki prognozlariga ko‘ra, O‘zbekistonga pul o‘tkazmalari 21 foizga, Tojikistonga 22 foizga va Qirg‘izistonga 32 foizga qisqaradi.
Buyuk Britaniyaga meva va sabzavot terish uchun yo‘l olgan markaziy osiyoliklar soni hozircha okeandan bir tomchi bo‘lishi mumkin. Ammo Rossiya Ukrainaga qarshi urush olib borishda davom etar ekan va uning iqtisodiyoti noaniq ekan, barcha muqobil yo‘nalishlardan foydalangan ma’qul.
Avvalroq Ukrainadagi urush sabab O‘zbekiston va boshqa davlatlarning fuqarolari Rossiyaga ishlash uchun borishi qanday kechayotgani haqida xabar berilgandi.