Rossiya va O‘zbekiston o‘rtasidagi yo‘lovchi temiryo‘l harakati 23-iyundan boshlab tiklanishi to‘g‘risida xabar berilgandi. “O‘zbekiston temir yo‘llari” Rossiya bilan tiklanayotgan poyezdlar harakati haqida rasman ma’lumot berdi.
Ma’lum qilinishicha, 23-iyundan boshlab 5/6-sonli Toshkent—Samara—Toshkent yo‘nalishida yo‘lovchi poyezdining harakatlanishi boshlanadi.
5/6-sonli Toshkent—Samara—Toshkent poyezdi haftaning payshanba kuni soat 19:05 da “Toshkent-Markaziy” temir yo‘l vokzalidan jo‘nab ketadi va shanba kuni soat 18:14 da Rossiyaning “Samara” temir yo‘l vokzaliga yetib boradi. Shuningdek, Samaradan yakshanba kuni soat 16:11 da jo‘nab ketib, Toshkent markaziy vokzaliga seshanba kuni soat 16:56 da yetib keladi.
Ma’lumot uchun, Toshkentdan Samaragacha temiryo‘l orqali bo‘lgan masofa 2271 kilometrni tashkil etadi. Poyezd 48 soat davomida harakatlanadi. 5/6-sonli yo‘nalishdagi yo‘lovchi poyezdi 11 ta vagondan iborat: 3 kupe, 7 platskart va vagon-restoran.
Chipta narxi to‘g‘risidagi ma’lumotni, sotuv muddatiga qarab chegirmalarni hisobga olgan holda, “Chipta.railway.uz”, “E-ticket.railway.uz” saytlari orqali bilib olish mumkin.
Eslatib o‘tamiz, O‘zbekistonda ilk bor koronavirus aniqlangan 2020-yil 16-martdan boshlab temiryo‘l transporti qatnovlari to‘xtatilgan edi. 2020-yilning 15-avgustidan mahalliy avia va temiryo‘l qatnovlari bosqichma-bosqich tiklangan. 2020-yilning iyun boshlarida 14-iyundan boshlab Toshkent—Samara va Toshkent—Volgograd yo‘nalishlari bo‘yicha haftasiga bir marta temiryo‘l qatnovi qayta tiklanayotgani ma’lum bo‘lgandi.
Izoh (0)