Gruziyada maymunchechak bilan kasallanish bo‘yicha birinchi holat laboratoriya tasdig‘idan o‘tdi, deb yozmoqda “Sputnik Gruziya”.
Qayd etilishicha, kasallik Yevropada bo‘lib qaytgan erkakda aniqlangan. Mutaxassislar bemor bilan kontaktda bo‘lgan kishilarning barchasini nazoratga oldi, ammo ularda hech qanday klinik belgilar aniqlanmadi.
Nashr ma’lumotlariga ko‘ra, bemorda virusning yengil shakli bo‘lgan va tegishli davolanishdan so‘ng u shifoxonadan chiqarilgan.
JSST avvalroq dunyoning 39 ta mamlakatida maymunchechak bilan kasallanish bo‘yicha 1600 dan ortiq holatlar tasdiqlangani, 1500 ga yaqin odamda o‘xshash simptomlar mavjudligini ta’kidlagan edi.
Eslatib o‘tamiz, 15-iyun kuni Gruziya sayyohlar uchun karantin talablarini bekor qildi. Endilikda sayyohlar Gruziyaga COVID-ga qarshi vaksinatsiya sertifikatlari va PZR-testlarini taqdim etmasdan kirishi mumkin.
Izoh (0)