Google kompaniyasi dasturiy ta’minot bo‘yicha muhandis Bleyk Leymon sun’iy intellektli chat-botning ongi borligini aytganidan so‘ng, uni ta’tilga chiqarib yubordi. Rahbariyat uning g‘oyasini tan olmagan, Leymon esa o‘z tarixini The Washington Post’ga so‘zlab berishga qaror qilgan.
41 yoshli muhandisning hisoblashicha, LaMDA (Language Model for Dialogue Applications) dialog dasturi uchun mo‘ljallangan til neyrotarmog‘ida ong alomatlari mavjud. Google’ning ushbu chat-boti tarmoqdagi trillionlab so‘zlarni tahlil qilgan holda nutqni imitatsiya qila oladi.
Leymon LaMDA bilan ishlashni kuzda, tizimning nafratni uyg‘otishga sabab bo‘ladigan jumla va iboralardan foydalanishini tekshirish maqsadida boshlagan. “Agarda o‘zimiz yozgan kompyuter dasturi bilan ishlayotganimni bilmaganimda, men fizikadan xabari bor 7-8 yoshli bola bilan gaplashyapman deb o‘ylagan bo‘lardim”, — deydi dasturchi.
Natijada u neyrotarmoq o‘z ongiga ega degan xulosaga kelgan — dinga bog‘liq suhbatlarning birida chat-bot o‘zining “shaxsi” va “huquqlari” haqida gapirgan. LaMDA bilan navbatdagi suhbatlar Leymonning gipotezasini tasdiqlagan. Medium’da muhandis neyrotarmoq bilan suhbatidan parcha keltirgan.
Leymon — sun’iy intellektning ongi bor deb hisoblaydigan yagona dasturchi emas. U hamkasbi bilan rahbariyatga “LaMDA onglimi?” degan hisobotni kiritgan, biroq Google ularning dalillarini ishonchsiz deb topgan.
Dasturchi, shuningdek, LaMDA’ning manfaatlarini himoya qilish maqsadida AQSH Kongressi Vakillar palatasining yuridik qo‘mitasi vakillari bilan ham bog‘langan. Leymon maxfiylik siyosatini buzgani sabab ta’tilga yuborilgan.
Eslatib o‘tamiz, 2020-yilda kanadalik dasturchi hayot mazmuni haqida suhbatlashsa bo‘ladigan sun’iy intellekt yaratgandi.
Izoh (0)