AQSH sobiq prezidenti Donald Tramp Kongressning Kapitoliy binosiga hujumni tekshirayotgan maxsus qo‘mitasi uning 2024-yilda bo‘lib o‘tadigan navbatdagi prezidentlik saylovlarida ishtirok etishiga to‘sqinlik qilmoqchi bo‘layotganini aytdi. Bu ayblovni u o‘zining 12 sahifalik murojaatida bayon qilgan, uning matni The Hill portalida keltirilgan.
Trampning da’vo qilishicha, u nafaqat respublikachilar, balki demokratlarning so‘rovlarida ham yetakchilik qilmoqda. Uning fikricha, bunga AQSHning amaldagi ma’muriyati harakatlaridan yuzaga kelgan “rekord darajadagi inflyatsiya, gaz narxining o‘ta yuqoriligi, energiya bo‘yicha raqiblarga qaramlik” sabab bo‘lmoqda. Sobiq prezident Amerika ta’lim tizimi inqirozga uchragani, noqonuniy muhojirlar mamlakatga “bostirib kirayotgani”, ta’minot zanjirining uzilishi “hayot tarzini buzgani”ni iddao qildi.
“Aftidan, turmush tarzimiz hukumat regulyatori tomonidan bosim ostida qolgan. Amerika Qo‘shma Shtatlari qulamoqda. Demokratlar men bularning barchasini tuzatishimni biladi, ular meni to‘xtatish uchun qo‘llaridan kelganini qilmoqda, ammo bizni to‘xtatib bo‘lmaydi”, — deb yozgan Tramp.
Trampning ta’kidlashicha, u sanab o‘tgan muammolarga “100 foiz soxta saylovlarda hokimiyatga kelgan demokratlar sabab bo‘lgan”.
AQSHda avvalgi prezidentlik saylovlari 2020-yilning noyabr oyida bo‘lib o‘tgan. Saylov natijalariga ko‘ra, Tramp 232 ta, uning raqibi Jo Bayden 306 ta ovoz to‘plagan. Bayden ovoz berish adolatli o‘tganini ta’kidlaydi.
2021-yilning yanvar oyi boshida Vakillar palatasi saylov natijalarini ma’qullaydigan kuni Tramp tarafdorlari Vashingtonda mitingga yig‘ildi. Namoyishchilar Kapitoliyni egallab oldi, ularga qarshi ko‘zni yoshlatuvchi gaz va shovqinli granatalardan foydalanildi. To‘qnashuvlarda besh kishi halok bo‘lgan. Bayden Trampni zo‘ravonlikka undaganlikda aybladi.
Izoh (0)