O‘zbekistonda hokim yordamchilariga mahalladagi davlat ko‘chmas mulk obyektini auksionga chiqarishga ruxsat berilishi mumkin

Davlat aktivlarini boshqarish agentligi “Davlat ko‘chmas mulk obyektlarini hokim yordamchilarining onlayn-buyurtmanomasiga asosan to‘g‘ridan-to‘g‘ri elektron onlayn-auksion savdolariga chiqarish tartibini tasdiqlash haqida”gi idoralararo qaror loyihasini muhokamaga qo‘ydi.

Hujjat bilan davlat ko‘chmas mulk obyektlarini hokim yordamchilarining onlayn-buyurtmanomasiga asosan to‘g‘ridan to‘g‘ri elektron onlayn-auksion savdolariga chiqarish tartibi tasdiqlanadi.

Unga ko‘ra, maydoni 2 ming kvadrat metrgacha bo‘lgan bo‘sh turgan davlat ko‘chmas mulki obyektlari hokim yordamchilarining onlayn-buyurtmanomasiga asosan to‘g‘ridan-to‘g‘ri elektron onlayn-auksion savdolariga chiqariladi. Bunda onlayn-buyurtmanoma hokim yordamchilari tomonidan Davlat aktivlarini boshqarish agentligining “Davlat mulki” axborot tizimi orqali beriladi.

Hokim yordamchilari onlayn-buyurtmanomalariga asosan davlat ko‘chmas mulk obyektlari muvofiq sxema bo‘yicha elektron onlayn-auksion savdolariga chiqariladi. Davlat ko‘chmas mulk obyektlarini sotish shartlari, agar prezident, Vazirlar Mahkamasi yoki Davlat mulkini sotishda tender savdolarini o‘tkazish bo‘yicha davlat komissiyasi qarorlarida boshqacha qoida belgilanmagan bo‘lsa, sotuvchi tomonidan belgilanadi.

Hokim yordamchisi o‘zi biriktirilgan mahallada aniqlangan bo‘sh turgan davlat ko‘chmas mulk obyektini sotish uchun axborot tizimi orqali onlayn-buyurtmanoma beradi. Hokim yordamchisi onlayn-buyurtmanomasida bo‘sh turgan davlat ko‘chmas mulk obyekti bo‘yicha quyidagi ma’lumotlar ilova qilinadi:

• obyekt to‘liq manzili;
• fotosuratlari va aniq geopozitsiyasi;
• obyektni kelgusida sotish bo‘yicha taklifi.
• Bunda, onlayn-buyurtmanoma hokim yordamchisi tomonidan elektron raqamli imzo bilan tasdiqlangan holda yuboriladi.

Axborot tizimiga onlayn-buyurtmanoma kelib tushgandan so‘ng agentlik hududiy boshqarmalari tomonidan uch ish kuni davomida:

• ko‘chmas mulk obyekti bo‘sh turgani;
• kadastr hujjatlariga muvofiq obyekt umumiy yer maydoni va bino-inshootlar egallagan maydoni hamda balansda saqlovchi;
• bo‘sh turgan ko‘chmas mulk obyekti ijtimoiy soha obyekti toifasiga kirishi yoki kirmasligi;
• bo‘sh turgan ko‘chmas mulk obyekti prezident, Vazirlar Mahkamasi, Qoraqalpog‘iston Vazirlar kengashi, viloyatlar va Toshkent shahar hokimliklari Hududlarni rivojlantirish dasturi (tarmoq jadvali)da mavjudligi yoki mavjud emasligi;
• xususiylashtirish dasturlariga kirgani, obyektdan kelgusida samarali foydalanish bo‘yicha vakolatli organ qarori mavjudligi;
• obyektga nisbatan taqiq (cheklov) mavjudligi o‘rganiladi;
• bo‘sh turgan ko‘chmas mulk obyekti joyiga chiqqan holda ko‘zdan kechiriladi.

Eslatib o‘tamiz, aprel o‘rtalarida Shavkat Mirziyoyev raisligida hunarmandchilik, tikuvchilik, kosibchilik, qandolatchilik kabi uy sharoitidagi kichik ishlab chiqarish loyihalarini mahallaning o‘zida kengaytirish kerakligi ta’kidlangandi. Yil boshidan buyon hokim yordamchilari tomonidan 5 mingga yaqin bo‘sh binolar aniqlangani ma’lum bo‘lgan edi. Hokim yordamchilari aniqlagan bo‘sh bino-inshootlarni sotish, ijaraga berishdan tushgan mablag‘lar ushbu mahallaning infratuzilmasini rivojlantirishga sarflanishi belgilangan. “Umuman, yil yakuniga qadar bo‘sh bino qolishi kerak emas”, — degan prezident.