S&P Global Ratings Farg‘ona viloyatiga “barqaror” prognozli uzoq muddatli kredit reytingini “B+” deb belgiladi. Bu haqda UzDaily xabar berdi.
Qayd etilishicha, viloyatning qarzi yo‘q. Mahalliy budjet ko‘rsatkichlari ham ijobiy. Kelgusi uch yilda viloyat budjet daromadlari respublika transfertlari hisobidan rejani ortig‘i bilan bajarishi kutilmoqda.
Farg‘onada so‘mdagi yalpi hududiy mahsulot hajmi keyingi besh yilda 228 foiz yoki uch barobardan ko‘proq, sanoat hajmi 2,8 barobar oshdi. 2022-yilda 13 foiz nominal o‘sish kutilmoqda.
2021-yilda jalb qilingan xorijiy investitsiyalar hajmi 512 mln dollarni tashkil etdi.Shu bilan birga, yanvar-may oylarida bu ko‘rsatkich 411 mln dollardan oshdi. 2022-yil oxiriga kelib esa 1 mlrd dollardan oshishi kutilmoqda.
Farg‘ona viloyatida 2021-yilda eksport hajmi 756 mln dollarni tashkil etgan bo‘lsa, joriy yilda eksport ko‘rsatkichi 1,1 mlrd dollarga yetishi kutilmoqda.
S&P Global Ratings O‘zbekiston aholisining 11 foizi ushbu mintaqada bo‘lishiga qaramay, mintaqaning O‘zbekiston yalpi ichki mahsulotidagi ulushi bor-yo‘g‘i 6 foizni tashkil etishini ta’kidlaydi.
Avvalroq Farg‘onadagi kompaniyaning 40 foiz davlat ulushi 20 mlrd so‘mga auksionga qo‘yilgani haqida xabar berilgan edi.
Izoh (0)