Iyun oyida Telegram messenjerida “qo‘shimcha funksiyalar, tezlik va resurslar”ga ega pullik obuna paydo bo‘ladi, deya ma’lum qilgandi uning yaratuvchisi Pavel Durov.
“Biz eng talabchan muxlislarimizga ko‘proq imkoniyatlarni taqdim etishning yagona yo‘li — hozirgi funksiyalarni bepul saqlab qolgan holda, yuqori tariflarni pulli variant qilish ekanligini angladik. Shuning uchun bu oy biz Telegram Premium obuna rejasini taqdim etmoqdamiz, bu har kimga qo‘shimcha funksiyalar, tezlik va resurslarni sotib olish imkonini beradi. Shuningdek, bu obuna foydalanuvchilarga Telegram’ni qo‘llab-quvvatlash va yangi funksiyalardan birinchi bo‘lib foydalanuvchi klubga a’zo bo‘lish imkonini beradi” — deb yozadi Durov o‘z Telegram-kanalida.
Shu bilan birga, u messenjerning barcha mavjud funksiyalari bepul bo‘lib qolishini va hatto ko‘plab yangi bepul funksiyalar paydo bo‘lishini ham va’da qilgan.
Telegram Premium foydalanuvchilari boshqa premium foydalanuvchilar tomonidan yuborilgan juda katta hajmdagi hujjatlar, media va stikerlarni ko‘rishlari, shuningdek, obunada mavjud bo‘ladigan noyob reaksiyalarga kirishlari mumkin bo‘ladi.
Durov obuna narxi va uning ishga tushirilishining aniq sanasi haqida xabar bermagan.
Izoh (0)