Islom Karimov nomidagi Toshkent xalqaro aeroportida 9-iyun kuni Favqulodda vaziyatlar vazirligi hamda Uzbekistan Airports AJ hamkorligida maxsus-taktik mashg‘ulot o‘tkazildi. Bu haqda “Daryo” muxbiri xabar bermoqda.
Ta’kidlanishicha, mazkur tadbir favqulodda vaziyatlarda qidiruv-qutqaruv xizmatlari, yong‘inga qarshi kurash, tibbiy bo‘linmalarning harakatlanish tartibi va tayyorgarligini baholash maqsadida tashkil etilgan.
Mashg‘ulot mavzusiga ko‘ra, samolyot uchish-qo‘nish yo‘lagiga qo‘nayotganida uning old shassisi ishdan chiqadi va yong‘in boshlanadi. Samolyot bortida 75 nafar yo‘lovchi, ekipaj a’zolari va 10 kilogramm xavfli yuk bo‘ladi. Passajirlarni tezkorlik bilan evakuatsiya qilish, yong‘inni o‘chirish va jabrlanganlarga tibbiy yordam ko‘rsatish bo‘yicha tadbirlar o‘tkazildi.
Tadbirni Favqulodda vaziyatlar vazirligi va Uzbekistan Airports AJ rahbariyatlari baholab bordi. Mashg‘ulot yakuni bo‘yicha ishtirokchilarga yo‘l qo‘yilgan xato va kamchiliklar yuzasidan tushuntirishlar berildi.
Izoh (0)