Davlat biznesni boshqarishda yuqori samaraga erisha olmaydi. Bu haqda tadbirkor Botir Orifjonov Toshkent viloyatida o‘tkazilgan “mGovAward” tanlovidan so‘ng, “Daryo” muxbiriga bergan intervyusida aytib o‘tdi.
Botir Orifjonovning ta’kidlashicha, davlatda boshqaruv parametrlari biznesnikidan umuman boshqacha.
“Fintek dunyoda juda tez rivojlanmoqda. Bir nechta davlatlarda fintek bo‘yicha loyihalarimiz bor. Biznes bozorida bo‘la turib, ayrim hollarda yaxshi ko‘rsatgichlarga yetib olishga qiynalamiz. Chunki ba’zan tezkorlik yetarli bo‘lmay qoladi. Davlat nuqtayi nazaridan qaralsa, u hech qachon bu turdagi bizneslarni effektiv darajada boshqara olmaydi. Va boshqarish imkoniyati mutlaqo yo‘q ham. Chunki davlatda boshqaruv parametrlari biznesnikidan umuman boshqacha. Misol uchun, korxonada o‘tirgan xodimga qancha ko‘p oylik bermasin, u o‘zini shu narsaga taalluqli ekanini sezmasa, butun vujudi bilan kirishib ishlamaydi. Qo‘l uchida ish qiladi. Oyligi va bonuslarini oladi, tamom. Vazirlikdan hech kimdan gap tegmasa, tinch bo‘lsa, bo‘ldi. Bunday holat bilan rivojlanish bo‘lmaydi”, — dedi tadbirkor.
Botir Orifjonovning qo‘shimcha qilishicha, oxirgi paytda O‘zbekistonda IT biznesini rivojlantirish imkoniyati kengaymoqda.
“Turli industriyalar bor. Ularni biri-biri bilan solishtirilsa, O‘zbekistonda zo‘r rivojlanayotgan industriyalardan bittasi — IT. O‘zim shu sohada bo‘lganim uchun buni ichidan ham, tashqarisidan ham bilaman. Agar ushbu sohaga eksport bo‘yicha qaraydigan bo‘lsak, eksportda o‘tgan yilga nisbatan o‘sishimiz karrasiga yuqori. Hech qaysi industriya bunchalik imkoniyat bermayapti. Umuman olganda, geosiyosiy jarayon, masalan, Rossiya va Ukraina o‘rtasidagi ziddiyatlar bizga «plyus”ga ishlayapti. Qaysi ma’nodaki, u yerdagi IT kompaniyalar bizga kelmoqda. Ko‘p kompaniyalarga hudud bilan ishlash uchun neytral bozor kerak. Bizda neytrallik bo‘lgani uchun ideal hamkor bo‘la olamiz. 2-3 yil oldin boshlab qo‘ygan ishlarimiz, o‘zining natijasini berib turgan paytda tashqi muhim bunaqa natija berib qolgani ideal bo‘ldi. Shu nuqtayi nazardan imokoniyatlar juda yaxshi. O‘sish templari baland. Keyingi 3-4 yil ichida bundan ham ko‘p potensialga ega bo‘lamiz deb o‘ylayman”, — dedi biznesmen.
Avvalroq IT-Park direktori Farhod Ibrohimov O‘zbekistonda axborot texnologiyalari qay darajada rivojlanayotgani, bu sohani tanlagan yoshlarga iqtidor va yaxshi muhit kerakligini aytgandi.