O‘zbekiston Turkmaniston orqali yuklarni tranzit yuborishga ruxsat oldi

2022-yil 1-iyundan boshlab, xorijiy davlatlar transport vositalariga Turkmaniston hududi orqali tranzit yuk tashuvlarini amalga oshirishga ruxsat etildi. Bu haqda O‘zbekiston Transport vazirligi xabar berdi.

Xorijiy davlatlar transport vositalari haydovchilari mamlakat hududi orqali quyidagi yo‘nalish bo‘ylab tranzit harakatlanadi: O‘zbekiston bilan chegaradagi Farap (“Olot” o‘tkazish punkti) va Eron bilan chegaradagi “Saraxs” o‘tkazish punktlari orqali.

Xorijiy davlatlar transport vositalari haydovchilari Turkmaniston davlat chegarasini kesib o‘tishda tranzit tashuvini amalga oshirish jarayonini rasmiylashtirish uchun zarur bo‘lgan barcha hujjatlarni maxsus sanitar ishlovdan o‘tkazish uchun taqdim etishlari shart.

Yuk avtotransport vositalarining tashkiliy jamlanmasi harakati davomida haydovchilarning dam olishi, transport vositalariga texnik xizmat ko‘rsatish, yonilg‘i quyish, zarur oziq-ovqat mahsulotlarini olish uchun maxsus belgilangan avtoturargohlarda to‘xtash ko‘zda tutilgan.

Harakat davomida nosozlik yoki boshqa muammo yuzaga kelgan taqdirda tegishli transport vositasi jamlanmadan ajratiladi. Bunday vaziyatda ichki ishlar organlari hodimlari Turkmaniston avtomobil transporti agentligi bilan birgalikda yuzaga kelgan muammoni hal qilishda amaliy yordam ko‘rsatadi.

Mamlakat hududi bo‘ylab tranzit yuk tashuvlari quyidagi talab va shartlarga rioya etgan holda amalga oshiriladi:

• belgilangan tartibda avtotransport vositalari sanitar tozzalashdan o‘tkaziladi;
• chegaradan o‘tishda PZR usuli bilan COVID-19 ga test sinovidan o‘tganligi haqida ma’lumotnoma (davlat chegarasidan o‘tishdan oldin kamida 72 soatdan ko‘p bo‘lmagan muddatda), koronavirusga qarshi emlanganlik to‘g‘risidagi sertifikat (oxirgi emlash sanasidan 42 kundan kam bo‘lmagan muddatda) taqdim etilishi shart;
• nazorat-o‘tkazish punktida COVID-19 uchun ekspress-testdan o‘tish.