Qirolicha Yelizaveta II sog‘lig‘idagi muammolar sabab hukmronligining 70 yilligiga bag‘ishlangan tadbirda qatnashmaydi

Britaniya qirolichasi Yelizaveta II bugun, 3-iyun kuni o‘z hukmronligining 70 yilligi munosabati bilan Avliyo Pol soborida o‘tkaziladigan marosimda qatnashmaydi. 96 yoshli qirolicha harakatlanishda muammolarga duch kelmoqda, deb xabar berdi Reuters.

Cherkovdagi marosimda qatnashmaslik to‘g‘risidagi qaror qirolicha 2-iyun kuni harbiy paradda qatnashib, biroz noqulaylik his qilganidan so‘ng “qiyinchilik bilan” qabul qilindi, dedi Bukingem saroyi. Qirollik oilasiga yaqin BBC jurnalisti Shon Kaflanning aytishicha, cherkovdagi marosimda ishtirok etish qirolicha uchun dindor shaxs sifatida boshqa tadbirlarga qaraganda muhimroq edi.

2-iyun kuni Londonda qirolicha taxtga o‘tirganining 70 yilligi sharafiga tantanali parad bo‘lib o‘tdi. Tadbirda qirollik qurolli kuchlarining turli bo‘linmalaridan 1,5 mingdan ortiq askar va 400 nafar musiqachi ishtirok etdi.

2—5-iyun kunlari Buyuk Britaniyada qirolicha Yelizaveta II ning platina yubileyi nishonlanadi. U Britaniya tarixidagi eng uzoq hukmronlik qilgan monarxdir.

Eslatib o‘tamiz, Yelizaveta II 10-may kuni parlamentning ochilish marosimini o‘tkazib yuborgandi. “Qirolicha harakatlanishda kichik muammolarni boshdan kechirmoqda”, — degan Bukingem saroyi o‘sha paytdagi bayonotida. U fevral oyida COVID-19 bilan kasallangan.